Un pas indevant e un idaûr su Sapade/Plodn in Patrie

Su Sapade-Plodn un gnûf piçul pas: la presidente de Regjon Debora Serracchiani, e à cjapât in man cjarte e pene scrivint une letare al president dal Senât Pietro Grasso par sburtâ il pronunziament de aule su pe leç pal passaç dal comun al Friûl. Lu à dit ai 8 di Mai, lant a cjatâ in compagnie dal president dal Consei regjonâl Franco Iacop il sindic Manuel Piller Hoffer, il president dal comitât referendari Alessandro Mauro e il vicesindic di For Davuatri, Manuele Ferrari, cjapant la ocasion ancje par fâ un cuadri dai rapuarts e dai progjets che a viodin lis dôs comunitâts impegnadis indipendentementri dal passaç definitîf di regjon.
«Cun cheste letare – e à spiegât la presidente – o domandìn che il Senât al meti in calendari il plui prest pussibil la discussion sul dissen di leç». Une richieste che e je stade presentade ancje dai parlamentârs di Forza Italia Anna Maria Bernini, Giovanni Piccoli e Sandra Savino: «di bande nestre e je la massime disponibilitât che l’iter di aprovazion de leç al rivi a conclusion, cheste discussion no pues jessi plui considerade margjinâl te agjende de ativitât parlamentâr e par chest o domandìn al Partito Democratico che si assumi la responsabilitât di puartâ la leç in aule». Il probleme «al è prin di dut politic – al à confermât Mauro, puartevôs dal comitât di Sapade-Plodn – e si augurìn che cumò il PD al si torni a spindi in prime persone. La int dal nestri paîs e à il dirit di vê une rispueste dopo nûf agns di agonie e limbo».
La leç e je stade puartade in aule ai 31 di Mai, ma il vôt al è stât rimandât, par vie de assence de reladore, la senadore Patrizia Bisinella: un altri rimant, duncje. La euro deputade dal Pd Isabella de Monte e à vût dit che «dutcâs, vê vût un passaç in Aule al è un element impuartant». In pratiche, in cheste maniere la leç e je stade “inclaudade” in Parlament e duncje si varà di lâ indevant cul iter e votâle. Sì, ma cun probabilitàt, dopo lis elezions. E cussì, Sapade-Plodn e varà ancjemò di spietâ chel che e à di vê par dirit.
✒ David Zanirato