Pre Antoni tai siei scrits al è simpri autobiografic, al partìs di riflessions che al fâs su di se. E, tacant de sô infanzie, tal cjâf al à come un film che i zire salt e nuie i scjampe. Il cjalâ indaûr nol è par nostalgjie, par vaî sore la sô miserie, lis sôs rognis, ma par capî, imparâ de esperience che e vâl plui di cualunche libri. E di chê strade, nus jude ancje nô a pensâ. (pre Roman Michelot)
Il troi ingredeât de mê vite
Mi capite, soredut tai dîs di ploie che ti tocje stâ fer o cuant che la fumate e il scûr lu tu âs dentri, che no tu âs voie ni fuarce di svolâ, di ripassâ come tune pelicule il troi ingredeât de mê vite e no rivi nancjemò a rindimi cont di ce salt straordenari che o ai fat, de strade che o ai rivât a fâ di cuant che lis mês puaris gjambutis sutilis come stecs e simpri glaçadis a àn tacât, come lis talpis di Pinochio, a balinâ chest mont cussì plen di maraveis e di brutis robis, a frontâ zigants, Golie spropositâts, jo che no dome no ai nissune armadure di difese ma che, a diference di David, no ai mai imparât a tirâ ni cu la fionde ni a man, che di fat mi ridevin ducj… La fortune mi à judât cul fat che par agns e agns no vevi la biciclete e che, in compens, o vevi buine gjambe e o corevi come un cjavrûl e o sfolmenavi vie come i jeurs che tun batût di voli a scjavacin il cjamp. Jo o vevi di scjavaçâ il cjamp dal mont, che nol è piçul, nol è facil, nol è clâr e tu sês simpri a riscjo di sbaliâ strade o di restâ cence flât. Pal moment, mi pâr di no vê fat grandis macacadis e duncje, par fânt di cumò indenant, o ai il vantaç che no ai avonde timp. Rivuart al sivilâ, mi contenti e mi consoli di sintî i miei canarins e ducj i agnuluts di plume, di ogni colôr e fatece e bielece, che a jemplin di vite la mê vecje canoniche che une volte e faseve une figurone come chê dal puar gno barbe don Abbondio, ma che cu la modernitât, cui comforts, cui gnûfs criteris architetonics aveniristics e spaziâi e je propit stonade e fûr di cors. Come che forsit al è stonât o fûr di cors il so incuilin dirocât. Ma li dentri a zuin, a paissin, a barufin, a morosin i gjats in plene libertât e, tal plan adalt, lis surîs a àn sigurade une vecjaie di assolude trancuilitât. Par dî che te vite no simpri dut al vâl par dut, ma alc al vâl simpri e al è simpri cualchidun che al pues cjatâ zovament. Duncje nol è nuie di butâ vie. Al pense za il timp.
Tal gno fantasticâ cence dret e cence presse, tal cjalâ rilassât e seren il percors de mê infanzie a cumò, o scuen prin di dut notâ la diference… Un salt secolâr, epocâl, inimagjinabil, fantastic e scandalôs. Un salt masse grant e gjeneralizât par iludisi che no nus rivi, anzit che no nus sedi za rivât il cont, e salât. Di fat, tal nestri nît dorât e iperprotezût o sin cjamâts di problemis e di fastidis no mancul grancj e no mancul fastidiôs di chei che si provave tes nestris puaris cjasis cu lis lastris rotis, cui mobii carulâts, cui cits clucâts, là che la mancjance di lûs in cualchi maniere e taponave la vision dolorose di une int puare e rassegnade.
Distirât te mê cineteche virtuâl, o sieri i voi e mi viôt un puar frut ingrisignît… Une animute cul cûr simpri cjalt, ma cu lis mans glaçadis, i dêts plens di poleçs, un pâr di bregonuts imblecâts che a lassin passât dut il frêt sot de gjambe, un cjanut che al à mil golis e fotis ma al sa che nol pues sodisfâlis. No par tristerie di cualchidun, ma parcè che e je cussì. E “parcè di sì” o “parcè di no” e je la plui grande rispueste che i siôrs a dan ai puars, che no an nissun dirit di fâsi e di fâ domandis. “Al è Diu che al à creât il siôr e il puar”, o ai let di cualchi bande. Mi pâr tal Coran. Ma e je une teologjie, une morâl, une filosofie che e vâl par ducj i popui di dutis lis religjons. E a ricuardâlu nol è tant il puar tai confronts dal siôr, che nol pues permetisi ciertis confidencis e ciertis pretesis, ma il siôr tai confronts dal puar, che nol pues permetisi un moment di distrazion e di debilece. Se no al cole il mont, si ribalte l’ordin, si va a sbati.
di pre Antoni Beline
