Sfuei Mensîl Furlan Indipendent
Archivi de Patrie

RICETE. Tarta de Santiago

............

Torte di Sant Jacum di Galizie
E je une torte une vore facile di fâ e pal fat di no vê farine di forment e va ben ancje par cui che nol pues mangjâ glutin.
Ingredients:
3 ûfs; 150 grams di farine di mandulis; 150 grams di zucar; canele; scusse di limon gratade; zucar a vêl.
Bati i ûfs cul zucar, fin che no vegnin sbrumôs e blancs.
Messedâ la farine di mandulis cu la scusse di mieç limon gratade fine e un tic di polvar di canele, zontâ un pôc par volte ai ûfs e zucar e messedâ di jù insù, cirint di no fâ grops e di no dismontâ l’impast.
Strucjâ l’impast tune tortiere (antiaderente o onte e infarinade) e cuei tal for za cjalt a 180°C par 15-20 minûts
Cuant che e je cuete e disfredade inzucarâle cul zucar a vêl, magari lassant tal mieç la forme de crôs di Sant Jacum di Galizie: al baste taiâ une crôs di Santiago di cjarte e poiâle su la torte prime di inzucarâle, e po gjavâle. ❚
Sandri Carrozzo