Nus à lassâts Marzi, un autonomist granitic

La ultime bataie e je stade chê dal «No» al referendum costituzionâl dai 4 di Dicembar, fate in non de autonomie dal Friûl-Vignesie Julie che lui al viodeve metude in crisi se e fos passade la cussì clamade riforme Boschi. Cun cheste sô posizion fuarte, il professôr Marzi Strassolt di Graffemberg al à mantignude fede aes sôs ideis e ae sô vision pal avignî dal Friûl fintremai ae fin.
Al è mancjât sul cricâ dal 2017, ai 5 di Zenâr, dopo une vite cun incarichis publichis di impuartance, dulà che al à simpri puartade la sô convinzion de impuartance de valorizazion de lenghe e de culture furlane.
Al veve 77 agns e un brut mâl.
Indotorât in Economie e Cumierç, al è stât retôr de Universitât dal Friûl par 9 agns, dal 1992 al 2001.
Tal ateneu al jere rivât di Triest tal 1987 par insegnâ Contabilitât e economie nazionâl te facoltât di Siencis bancjariis. Al è stât, po, president de Provincie di Udin dal 2001 al 2007.
Al jere duncje un autonomist granitic, convint che la lenghe e fos un aspiet identitari fondamentâl e bon ancje di jessi une risorse economiche, come che al à sostignût ancje tal so ultin libri Economia delle minoranze linguistiche. La tutela della  diversità come valore (2016 ed. Carrocci).
Finîde la incarghe te Universitât, subit si è presentât aes elezions provinciâls tant che president cuntune coalizion di centridiestre, si ben che la sô bussule e fos simpri chê dal autonomisim. Al fo elet al prin turni cun passe il 57% des preferencis e riconfermât tal 2006, ma tal Dicembar dal 2007 si dimetè dopo che il Consei provinciâl i votà la sfiducie par un afâr di vôts di scambi, peât propit ae rielezion. Une storie finide tal 2012, cuant la Cort di Apel e à stabilît di no vê di procedi. Strassolt al è jessût net ancje di un procediment penâl pe assunzion di un avocat in Provincie.
Di mari ongjarese e pari furlan, insiemi cui fradis al jere erêt di une famee di clare linie asburgjiche. Te capele privade de tignude di Strassolt, une sô ave, la contessine Franziska Romana di Strassolt Graffenberg, e sposà il maressial Josef Radetzky.
La passion dal professôr Strassolt pal Friûl no je lade al mancul lassâts i impegns istituzionâi. Al è fondadôr de associazion Identitât e Inovazion e al à leât a strent il so non a chel de Societât Sientifiche e Tecnologjiche Furlane, par doprâ la lenghe furlane tai ambients sientifics. Al è un esempli la riviste che la Socie e mande fûr, dulà che a son publicadis lis ricercjis e i studis di docents universitaris par furlan e par inglês.«Cun lui al va vie une part impuartant de storie dal nestri zovin ateneu, che par nûf agns al à savût vuidâ cun grande energjie e determinazion, contribuint in forme significative ae sô afermazion e svilup», al à dit il retôr di cumò Alberto Felice De Toni. L’ateneu al à un rapuart profont cul Friûl e «Marzi Strassolt al jere un interprete autentic di cheste mission”. Tal 1995 al promovè la fondazion dal Centri Interdipartimentâl di Ricercje su la culture e la lenghe dal Friûl e tal stes an al invià la costituzion di Friuli e Formazione e tal 1999 di Friuli Innovazione, il parc sientific e tecnologjic. «Te sô idee a jerin i imprescj operatîfs di une universitât che e veve di metisi al servizi dal teritori e de comunitât di riferiment, intune prospetive di svilup dinamic, che e valorizàs e e atualizàs cheste identitât e cheste culture par vierzile viers il doman» al à ricuardât ancjemò De Toni. ❚
✒ Antonella Lanfrit