NO SON PERAULIS PAR VECJOS. Influencer

_Mandi, nono!
Mandi frute! Cemût?
_Ben, nono. Tu, ce stâstu fasint?
O cjalavi un dibatit par television, ma no rivi a capî masse. Cui sono chei li che a fevelin?
_Fasimi viodi, nono.
Chel li lu cognòs, al è Carlo Conti. No ai i ocjâi, ma cuant che o viôt une magle scure al è simpri lui. Ma cui sono chei altris che a stan li a fevelâ?
_Alore: chel li no lu cognòs nancje jo. Chel li al è un gjornalist, chel li al è jessût di un talent show, e chel li al è un influencer.
Al à la influence? Ma puar frut! No podevial stâ a cjase? No vevino nissun altri di clamâ?
_No, nono, nol à la influence, al è un influencer! Al è un che al “influence” chei altris. Al pues jessi un blogger, un youtuber,
un VIP, baste che al vedi un grum di followers.
Planc, planc. Di dut ce che tu âs dite o ai capît dome i articui. Lasse stâ chês altris bestiis e torne a dîmi di chel li cu la influence.
_Cemût aio di fâti capî? Provìn cuntun esempli: e je une fashion blogger che…
No sta a cjapâmi pal nâs, cumò!
_No, scusimi, nono, no volevi. Alore: une fashion blogger e je une che si vistìs di mode, e met su internet lis sôs fotos, cussì un che le cjale al pues cjapâ ispirazion e savê cemût vistîsi. Par chel, si dîs che e je une “influencer”.
No crôt di vê capît: e je int che e va a cjalâ su internet cemût che si vistìs chê chi par sielzi cemût vistîsi?
_Sì, nono, une robe dal gjenar.
E se in chê dì chê là si è vistude lizere e invezit al è frêt? Par fuarce che dopo a cjapin ducj la influence! Ma ce fasino chei chi di mistîr?
_I influencer! Lis aziendis ju pain par che a fasin viodi che a metin sù i lôr vistîts, o che a scoltin la lôr musiche, o che a doprin lis lôr robis.
Usti! Ce biel cussì. Invezit di paiâ par un vistît, a vegnin paiâts?
_Sì, nono. In font, e je dute publicitât.
Sarà. Ma tu ricuarditi, frute: no sta a fâti influençâ, nancje di chei li che lu fasin di mistîr. E se al sucêt, cjol une aspirine e un pôc di lat cu la mîl e tu viodarâs che ti passe dut! ❚
✒ Bete Di Spere