Al ‘San Simon’ 2016 al è un fumut che al ven premiât cun la publicazion

Nol è mancjât nancje un colp di sene inte ultime edizion dal Premi San Simon, l’oscar de leterature par furlan inmaneât di 37 agns dal Comun di Codroip. Chest an a son stâts trê i premiâts. La sezione narative e à regjistrât un ex aequo che al à vût pôcs precedents: la jurie di fat e à ritignût di assegnâ il Premi a dôs oparis di autôrs cetant diferents par gjenerazions, ambits teritoriâi e tindincis leteraris. I doi lavôrs a son il romanç Un flât di American di Gino Marco Pascolini, classe 1946, za sindic di San Denêl, e la racuelte di contis Plaidarts, di Gianluca Franco, autôr di Caprive dal Friûl za segnalât l’an passât cul romanç Il buinç.
Il prin autôr al è stât bon di vinci ancje il premi de jurie popolâr dal public di Spietant il San Simon, serade speciâl di presentazion dai cuatri finaliscj: oltri ai doi premiâts di fat a son stâts segnalâts ancje i biei romançs di Adriano Nascimbeni I tribui di un predi e di Sarah Del Sal Faiilì, il pàs traditôr. Ancje chei a son tescj une vore origjinâi. Il prin al è la storie di un zovin che al ven fûr dal seminari e al scuen dimostrâsi plui fuart de debolece di un altri predi che al volarès puartâlu sul troi de perversion. Ae fin al scuvierç l’amôr: ma la femine che jal presente devant no je propit che juste… Il romanç de Del Sal – zovine autore di Tisane – al è invezit un zâl ambientât tal mont dal spetacul, tant che l’omicidi si davuelç suntun palc di teatri. Il stîl stes de scriture al è dramatizât e une vore intrigant, cuntune narazion a plui vôs che e funzione une vore ben dal pont di viste leterari.
L’opare di Pascolini e je une sorte di narazion “on the road” de storie di un zovin mulat, fi di une furlane e di un militâr american de base di Davian, che al va a cirî so pari che al è scjampât bandonantlu cuant che al jere piçul. L’indagjine lu mene su lis stradis de Californie, dulà che il pari no si cjate ma intant si inçopedisi in paisaçs maraveôs e storiis che a vegnin dretis de beat generation fintremai a un finâl a sorprese. Gianluca Franco invezit al met dongje inte so racuelte tantis vicendis di personaçs che la Storie e à condanât tant che maledets. Ma la distorsion di un judizi storic che al è dispès masse di part o no avonde obietîf e ven corete de pene dal scritôr: dal Patriarcje Nicolau di Lussemburc al ”Ors di Pani” (Toni Zanella), i dodis oms e feminis sielzûts di Franco a van a formâ un “Lunari di vitis comedadis”. La sô “verve” narative, cuinçade cuntun furlan une vore preseabil e un lessic sielt,e permet di justâ il tîr, e jemplâ di umanitât ancje lis lôr storiis.
Nissun dai doi libris dut câs al varà par premi la publicazion, parcè che al è stât il tierç lavôr premiât a jessi stampât e editât de Forum in graciis dal Comun di Codroip che al organize il ricognossiment. Al è il vincitôr de gnove sezion pai Fumuts, Il costrutôr di trabicui di Giovanni Di Qual, zovin grafic di Tumieç. La sô storie, dal trat potent e de buine fuarce narative, e à concuistade la jurie, e e à viert un troi par une gnove espression leterarie zovine e creative. ❚
✒ Walter Tomada