LA POESIE. La sere dai Sants (1974)

Alte sui ciamps la lune
fra il Modeàn e Rive Grande
no baste par impiâ
‘l oru da li’ fueis distudadis
prime dal lament
da li’ ciampanis.

Gianfranco Ellero (1937). Nassût a Frofean, gjornalist, storic, om di culture une vore ecletiche, espert di art e fotografie, al è stât impegnât ancje in politiche (Moviment Friûl). Al à vût direzût Friuli d’oggi, Corriere del Friuli e po Sot la nape, il trimestrâl de Filologjiche. La sô poesie e je une vore leade al paisaç de sô infanzie e aes personis che, in chel contest, al à cognossudis, come che ancje i titui des racueltis a fasin capî: Orlois (1974), Ritras e ricuars (1977). In plui des numerosis publicazions par talian, a  son di memoreâ ancje lis poesiis di Ciaint de amour par Mugla, scritis intal antîc furlan che si fevelave a Mugle e che al è disparît.
par cure di Laurin Zuan Nardin