EDITORIÂL – Lenghe e culture fondis de autonomie: il câs de scuele

Lis lenghis de comunitât a son ancje lenghis di scuele, vâl a dî che a son lis personis che a fevelin une lenghe che le fasin vivi; no si pues pensâ che e  sedi la scuele a salvâ la lenghe se no je vive la cussience antropologjiche dentri la comunitât che le fâs deventâ identitât ative te vite di ogni dì; l’insegnament dal sigûr al pues infuartî e promovi la cussience coletive.
_ Pasolini al veve capît ben la cuistion, cuant che al diseve: «A vegnarà ben il dì che il Friul al si inacuerzarà di vei ‘na storia, un passât, ‘na tradizion!». In atris peraulis che al varà cussience de sô identitât di popul. La lenghe e je un dipuesit “gjeologjic” di significâts, valôrs, interpretazions viventis che a fasin di ciment di une comunitât. E je un ben comun, un grant patrimoni di sapience che al va simpri capît di gnûf e vivût parcè che al fâs part dal sisteme de vite.
_La Costituzion Taliane e ricognòs i dirits de persone ancje se si fevelin lenghis diferentis, e sburte lis autonomiis dai teritoris e e tutele (no par difindi, ma in maniere ative par fâ cressi ) lis minorancis linguistichis (art.6). La pluralitât e va ricognossude come valôr che al fâs cressi e che i da fuarce ae unitât te diversitât.
_Cu la leç n.482/1999, passe 50 agns dopo de Costituzion, si definissin lis regulis par tutelâ lis lenghis des minorancis (mi plâs di plui clamâlis lenghis de comunitât) e cun tun Decret legjislatîf dal 2002 (nr.223), a son stadis definidis normis pal trasferiment di funzions in materie di tutele de lenghe e de culture des minorancis linguistichis storichis ae Regjon. Ma il cjamp di azion al è stret.
_La debilece e nas dal Statût regjonâl, che al dîs: «La Regione ha facoltà di adeguare alle sue particolari esigenze le leggi della Repubblica emanando norme di integrazione e attuazione…». Adegua, integra e attua a son verbis che a fasin intindi che il Statût al pant la idee che la istruzion e je robe dal Stât e che la Regjon e pues meti cualchi funzion di plui, ma vonde li.
_Se a si vûl che il furlan al sedi presint cun dignitât e a plen titul te scuele, covente movisi te direzion di contratâ cul Stât un slargjament des competencis inte istruzion, come tal model trentin e sudtirolês.
_Il grop al reste istituzionâl, e al pues jessi disgropât se la Regjon e sburtàs par une competence primarie inte istruzion. La sielte e je politiche: vâl a dî, meti i “ocjâi juscj” par lei ben il significât di une oportunitât che il nestri teritori al à, pe presince di une diversitât linguistiche e antropologjiche-culturâl, che e pues deventâ un model Friûl ancje pe scuele, pluri/interlengâl e pluri/interculturâl.
_Al sarès ancje un mût par gjavâi retoriche al autonomisim e par jemplâlu di contignûts che lu fasin deventâ atîf. ❚