Medaie de Provincie di Udin a bonsignôr Gian Carlo Menis

«Un grant om di culture de nestre diocesi. Un dai tancj oms di glesie che intal ‘900 nus à judât a no dismenteâ lis nestris lidrîs e i nestris valôrs». Cun chestis peraulis il president de Provincie di Udin Pietro Fontanini al à acompagnât ai prins di Lui, la consegne de medaie istituzionâl a bons. Gian Carlo Menis, diretôr emerit dai Museus diocesans e Galariis dal Tiepolo. Un omaç a une figure di predi, insegnant, storic e archeolic impegnât inte tutele dal patrimoni artistic dal Friûl e pe valorizazion de sô storie.
L’arcivescul di Udin bons. Mazzocato al à ricuardât che la ativitât di bons. Menis si sedi concretizade in doi aspiets, jessi predi e jessi furlan: «Lis dôs dimensions si son fondudis in bons. Menis tant che in altris grancj predis che a àn maridât la ativitât pastorâl cul amôr par cheste tiere e la sô storie».
Bons. Menis al à marcât che tra i siei lavôrs chel plui impuartant al è stât la Storie dal Friûl des origjins ae fin dal stât patriarcjâl: «A son tancj i furlans che a àn il savôr de lôr patrie. Parcè che il Friûl al è une vere patrie: magari piçule tant che teritori ma tant antighe inte sô anime, che cualchi politic al cîr di fâ dismenteâ. Ducj si visin ancjemò lis bataiis dal 1945 par ricognossi il Friûl tant che regjon autonome».
«Al è impuartant – si è racomandât – che il popul furlan di vuê nol pierdi la cussience de sô autonomie culturâl». Concludint cuntune esortazion «Che al vivi il Friûl! Cun Udin tant che capitâl e il cjistiel tant che sede dal Patriarcje e dal guvier nazionâl». (LPdF) ❚