Scrivi cine par furlan: ancje chest an il concors

Prudelâ la scriture di storiis par cines e senegjaturis, di articui di critiche e di saçs cinematografics par furlan, deventant cussì une palestre par autôrs e critics di cine. Cheste e je la smire dal Concors par Tescj Cinematografics in Lenghe Furlane inmaneât dal CEC. Ce tancj autôrs a son vignûts fûr di chest concors che si fâs ancje intal 2016 e al è timp fin ai 11 di Setembar par presentâ i lavôrs.
I scrits a àn di rivâ in buste sierade e anonime (cun sù scrit dome il titul de opare) li dal CEC – Centro Espressioni Cinematografiche, in vie Villalta, 24 a Udin.
Chest an si pues partecipâ a cuatri sezions:
* Sezion par senegjaturis cuntun prin premi di € 1.500
* Sezion par articui di critiche (su un dai films proietâts intant de Mostre dal Cine 2015) cuntun prin premi di € 400
* Sezion storiis par film (sogjets) cuntun prin premi di € 250
* Sezion saç cinematografics cuntun prin premi di € 250
Lis senegjaturis a àn di jessi scritis cu la grafie uficiâl e in furlan comun pes parts descritivis e tecnichis, a son ametudis variantis intai dialics simpri intal rispiet de grafie uficiâl.
I articui di critiche a àn di jessi scrits par furlan comun e in grafie uficiâl. La lungjece no à di superâ lis 3 cartelis.
Lis storiis par film (sogjets) a àn di rispietâ la grafie uficiâl e la lenghe comun. La storie par film no compuarte dialics e no à di jessi plui lungje di 10 cartelis.
I saçs a àn di rispietâ la grafie uficiâl e la lenghe comun e no àn di jessi plui luncs di 10 cartelis.
I lavôrs vincidôrs e chei segnalâts a saran publicâts tal numar che al ven de riviste di cine Segnâi di lûs.
La premiazion si fasarà tal mês di Dicembar di chest an li dal Visionario di Udin.
Il bant complet dal concors si cjate sul sît www.mostredalcine.org.
Par ogni altre informazion si pues contatâ il CEC – Centro Espressioni Cinematografiche: tel. 0432-299545. ❚
✒ Redazion