30 agns di grafie uficiâl de lenghe furlane: il percors

A jerin dôs scuelis principâls di scrivi par furlan, chê di pre Josef Marchet e de Filologjiche e chê di pre Domeni Zanier e di Int Furlane e Glesie Furlane. Po, tai agns Setante, si zontarin chê di Scuele Furlane e di Giorgio Faggin, codificade tal Vocabolario della Lingua Friulana dal 1985. Tancj po a jerin chei che a inventavin altris sistemis.
Pôcs a capirin che la soluzion par meti fin ae anarchie des grafiis no jere dome tecnico-linguistiche ma politiche. Le capirin tal Moviment Friûl e il plan par rivâ a une grafie unitarie normalizade, coerente e semplificade, precundizion par une gnove politiche linguistiche de lenghe furlane, al fo eleborât tal Moviment Friûl, parie cul scheme di leç che po e deventà la LR 15/97, che e inviave la gnove politiche linguistiche e ricognosseve ancje la uficialitât de grafie normalizade individuade dîs agns prin des Provinciis dal Friûl. Il plan al fo presentât di cui che al firme chest articul e al fo acetât dal assessôr ae culture de Provincie di Udin Oscarre Lepre.
Si istituì une Comission ricognossude dal Consei de Provincie, membris Adrian Cescje (president), Etelredo Pascolo, Gianni Nazzi, Silvana Fachin Schiavi, Erando Sgubin, Giancarlo Ricci, Amedeo Giacomini, Aldo Moretti, Giovanni Frau, Piera Rizzolatti,  Nereo Perini, che e lavorà dal Jugn 1985 al Setembar 1985, e nomenà un arbitri pe sielte definitive, Xavier Lamuela, che al presentà la sielte tal Otubar dal 1986, che e fo publicade tal Zenâr dal 1988.
No ducj in chê volte a acetarin la propueste di Lamuela, dome il Moviment Friûl, Scuele Furlane, la Union dai Scritôrs Furlans e La Patrie dal Friûl. Ma cuant che e fo ricognossude grafie uficiâl de LR 15/96, e dopo che e passà la prove dal ricors de Societât Filologjiche Furlane tal 1996-97 cuintri il decret che le ricognosseve, si difondè cun facilitât, massime in gracie dai struments linguistics eletronics (Dizionari Ortografic Furlan, Coretôr Ortografic Furlan, Grant Dizionari Bilengâl TF), che cence la normalizazion de grafie no varessin podût sei dâts dongje. ❚
✒ Adrian Cescje