Samba furlan. Cuant che si cognossisi, l’integrazion e ven facile

Nô de La Patrie dal Friûl lu cognossìn ben e di tant timp Daniel Samba, il “furlan piturât di neri”, come che lu clamin e si fâs clamâ lui par prin. Rivât dal Camerun di 14 agns in Italie domandant asîl politic, cumò autist de Saf e cun famee in Friûl, lu cognossìn – si diseve – par vie che al à fat tantis robis in lenghe furlane. Trasmissions a Radio Onde Furlane, ancje di condutôr, atôr tai cines di chei di Felici ma furlans, protagonist di spot de ARLeF sul ûs dal furlan.
Sì, parcè che Daniel il furlans lu sa ben: al à tacât a imparâlu a Cividât cuant che al faseve cors ae Cfp, cumò Civiform. I someave al todesc che al veve bielzà imparât e cussì al à tacât a fevelâlu. Si sa: fevelâ dôs lenghis al invie ae tierce, par passâ ae cuarte, e vie indevant. Chel che si dismentein tancj gjenitôrs furlans che no lu insegnis ai lôr fruts, magari cussì no.
Notorietât “social”. Cumò però no lu cognòs dome un grup ristret di personis che lu à seguît tai siei lavôrs par furlan: al è sucedût che al è stât publicât on line un video li che Daniel al fevele cui coleghis e al cite dute une serie di proverbis classics par furlan, dimostrant no dome paronance de lenghe, ma ancje de culture furlane (intant che cualchi coleghe furlan al lave indevant a fevelâ par talian, invezit). Il video al à vût un sucesson: une sdrume lis visualizazions, cuntune vore di coments positîfs, ancje di int che par solit le à cuintri dai imigrâts.
Nus pâr che e sedi la dimostrazion che cuant che si cjatisi devant di une persone, ancje se “piturade di neri”, e no di articui di gjornâi o speculazions di cualchi politic, la integrazion e il dialic a vegnin naturâi.
Ducj scaturîts e amirâts i gnûfs fan di Daniel, duncje, ma il vês pas indevant al sarà cuant che une robe cussì no fasarà plui notizie. Al di là des pituris. ❚
✒ Redazion