NO PAR FURLAN… MA BOGNS. Musica Endemica, il gnûf viaç dai Lou Dalfin

Di passe trente agns Lou Dalfin al vûl dî pratiche cuotidiane e reinvenzion de tradizion musicâl de Ocitanie, cun contaminazions di sunôrs, di ritmis e di lengaçs diferents. La band vuidade dal cjantant e polistrumentist Sergio Berardo e à dât fûr un gnûf disc che tal so titul, Musica Endemica, al palese un leam fuartonon cun chê tiere che e va des Alps ai Pireneus e dal Mediterani al Atlantic.
Il cd al ten dongje 14 cjançons che a san di rock e di folk di tancj colôrs e che, par ocitan e intun câs ancje par catalan (L’àngel de Serrabona), a contin storiis là che si incrosin la atualitât, la memorie, la poesie e la ironie: un viaç cence confins, tra vacancîrs de domenie (I vilejants), int de mont e dal mont (Gigants, Lo darriergardian, Los taxis de Barcelona), alternatîfs in pose (Provincia clandestina) e ricuarts de Ete di Mieç (Lo negat e Terra 1209).
Lou Dalfin, Musica Endemica, cd, 2016 ❚
________________________
Une Babêl siore e vivarose
Un libri che al prove a contâ lis minorancis linguistichis dal Stât talian, tra esistence e resistence, rivendicazions e progjets, leçs e iniziativis culturâls e politichis. Al è La ricchezza di Babele, di Valter Giuliano, gjornalist, operadôr culturâl, politic e aministradôr locâl.
La publicazion e je une sorte di diari di viaç, che al cjape dentri articui di caratar divulgatîf fats dal autôr ancjemò tal 1991 pe riviste ALP e testemoneancis in cont de tutele des minorancis tai ultins 20 agns, partint de realtât des comunitâts di lenghe ocitane, francese e francoprovençâl dal Piemont e de azion di tutele des minorancis inmaneade de bande de Provincie di Turin, là che Giuliano al è stât Assessôr dal 1995 al 2009, e che si slargje ae Europe.
V. Giuliano, La ricchezza di Babele. Politiche per la tutela e la valorizzazione delle minoranze linguistiche (…). 2000-2015, Chambra d’Oc, Roccabruna, 2015 ❚