CJARGNE. Il “Centri di jutori ae vite” di Tumieç

Ancje intune societât come la nestre, indulà che al somearès che ducj o sedin intune cundizion di benstâ, a son tantis personis che a vivin cun dificoltât e il plui des voltis a àn bisugne di sburts par podê lâ indevant.
tal 2010 a tumieç al nas il centri di jutori ae vite onlus cu la finalitât di promovi e di sostignî il dirit ae vite di ogni om e, in particolâr, di sostignî la vite umane ancjemò tal grim de mari e/o a pene vignude al mont.
«La mission dai nestris volontaris – e dîs Katia Dorigo, presidente de associazion – e je chê di vierzi lis puartis a cui che al ven tal Centri. Di solit o vin maris che a spietin un frut e si cjatin di bessolis a lâ indevant, o vin ancje cubiis cun fruts za nassûts che no rivin ae fin dal mês. I nestris volontaris a vierzin une schede par ogni persone e a tachin une relazion interpersonâl par viodi de situazion e par capî cemût intervignî e cemût cuantificâ lis risorsis. Par esempli, la associazion e cjape in caric i coscj des faturis des utencis di cjase, dai afits, simpri dopo vê fate la juste valutazion. La associazion e vîf in gracie dai volontaris e dai contribûts de int sedi sot forme di bêçs che di materiâl.»
La sede dal centri si cjatile a Tumieç in vie Spalto n. 9/g e e je vierte ogni vinars des 15.30 aes 16.30. Clamant il numar 333/7677866 al è pussibil metisi in contat cui operadôrs dal Centri. Il numar al è atîf 24 oris su 24. La presidente, Katia, e dîs che «di solit lis richiestis di jutori a vegnin fatis vie telefon e al clame il diret interessât o altris personis che a segnalin situazions di bisugne. A chest numar a vegnin dirotadis ancje lis richiestis che a vegnin de Cjargne fatis al numar vert nazionâl SOS VITA 800-813000, simpri atîf 24 oris su 24. Al è clâr che nô volontaris o din une man cu la massime riservatece.»
Par vecjo si diseve che indulà che al nas un frut il Signôr al proviôt al pagnut: la famee, se no rivave, e vignive judade di altris fameis. Vuê al mancje chel spirt di stâ insiemi ma al è inmò cualchidun che al met a disposizion un pôc dal so timp par judâ chei altris, come i volontaris dal Centri di jutori ae vite. ❚
✒ Marta Vezzi