Nuie di fa, trê scufiots in muse ae democrazie. Cu lis decisions, a maiorance, dai 5 di Lui di bande dal Consei regjonâl, si è stabilît che i citadins dal Friûl-Vignesie Julie no podaran esprimis su trê des riformis plui contestadis dai ultins agns in Regjon. Nuie referendum sul gnûf model di sanitât, nuie referendum su lis Uti, lis Unions teritoriâls intercomunâls che a dovaran cjapâ il puest des provinciis abolidis aromai definitivementri, nuie referendum nancje su pe propueste di dividi la Regjon in dôs provinciis autonomis (Friûl di une bande, Triest di chê altre, sul model dal Trentin e dal Sud Tirôl).
«O vin assistût a une decision vergognose, cuintri il popul», al à comentât a cjalt il sindic di Rivignan-Teor, Mario Anzil, puartevôs dal comitât “Tuttiperilfriuli”, domandant po dopo ai furlans di meti ducj fûr dai barcons la bandiere cu la acuile patriarchine: «e il popul justementri al reagjìs, il Friûl al reagjìs e nol dismentee». Dal stes tenôr il pinsîr dai comitâts pe sanitât, in bataie di un grum di mês di Sacîl a Glemone, di Gurize a Tisane a Monfalcon: «Ancjemò une volte la Zonte Serracchiani e il centri çampe che le sosten a àn dimostrât la considerazion che a àn de volontât popolâr. A son stâts plui di 2.500 i citadins che a àn firmât par domandâ il referendum su la abrogazion de leç, a testemoneance dal malcontent gjenerâl che al è petât sù, dai monts al mâr, dopo la aplicazion de gnove sanitât. Nô dut câs no si fermarìn e o sin pronts a gnovis iniziativis, sigurementri aes prossimis elezions si impensarìn di cui che al à votât No ae amissibilitât dal cuesît».
Dopo bonade la rabie, il comitât vuidât di Anzil si è subit cjatât cun Giorgio Marchesich, leader dai triestins che a stan pontant al ricognossiment dal TLT, il Teritori libar di Triest, e si è stret un pat politic par unî lis varis animis teritoriâls dal indipendentisim, dal autonomisim e dal ambientalism furlan e triestin; si son costituîts vêrs Comitâts di Liberazion, pronts dai prossims mês a «ristabilî un nivel minim di democrazie e di libertât, violât de decision dal consei regjonâl, e tornâ a rilançâ il progjet des dôs provinciis autonomis dal Friûl e di Triest».
Il prossim banc di prove pe Zonte al sarà, dut câs, une gnove richieste di referendum, chel proponût dai sindics e dai comitâts pe abrogazion de leç sul servizi idric e des scovacis, altre riforme contestade, soredut pe sô filosofie di font che e ponte a un acentrament des decision e de gjestion, preludi – secont i comitâts – ae svendite de aghe aes multiutility dal Nordest. ❚
✒ David Zanirato
