La Setemane de culture furlane de SFF, une plene imersion inte furlanetât

Dal 5 al 16 di Mai, plui di cent apontaments in passe setante localitâts. A son chescj i grancj numars de tierce Setemane de culture furlane, organizade de Societât Filologjiche Furlane in colaborazion cuntune schirie di ents e di associazions. Cunvignis, conferencis, incuintris, concierts, spetacui, mostris, presentazions di libris, ativitâts pai fruts, pai zovins, pai grancj, par ducj. I sogjets e i temis di cheste gnove edizion a son cetant varis, inte volontât di cjapâ dentri inmò e di fâ cognossi a plui int pussibile, dut il straordenari patrimoni dal Friûl, cence dismenteâ di contâ ancje il mont atuâl. La storie, lis tradizions, il teritori, la art, la lenghe, la musiche. Ancje chest an la Setemane e pues contâ su pe partecipazion e il jutori di associazions culturâls, côrs, grups teatrâi, personalitâts de culture locâl, pro loco, scuelis, plêfs e glesiis.
Come che al à declarât il president de societât filologjiche furlane federico vicario, in ocasion de conference stampe: «Ancje chest an la Setemane e met al centri de rassegne i moments plui impuartants de vite de nestre comunitât, tant che il dramatic Orcolat di cuarante agns fa, o la ativitât di personis cetant impuartantis pe nestre int, che al cole chest an ancje par lôr un inovâl significatîf, come David Maria Turoldo, Josef Marchet, Renato Appi, Gjiso Fior. O vin contât ancje chest viaç sul aiût di tancj amîs, par trasmeti insiemi l’ideâl di un Friûl plui unît, plui fuart e plui cussient, che al sa meti dongje la promozion dal teritori e dal passât, cuntune gnove vision dal doman.»
Tra i tancj apontaments, ducj di seguî, nô us segnalìn: la viertidure ai 5 di Mai inte sale consiliâr di Glemone cu la cunvigne: Recuperi e restauri dai bens archivistics e libraris. Da la esperience dal taramot ae gjestion des calamitâts. La memorie di Pre Josef Marchet intal cincuantesim aniversari de muart, che al colarà domenie ai 8 di Mai (viôt pagjine a man çampe, ndr), cuntune Sante Messe in lenghe furlane aes 7 di sere intal Domo di Glemone, compagnade de Corâl Glemonensis. L’apontament cu la presentazion dal numar de nestre riviste che o stais leint: La Patrie dal Friûl, dal 1946 il sfuei in marilenghe, lunis ai 9 di Mai aes 20.30 inte sale consiliâr a Cjarlins e la sieradure, domenie ai 15 di Mai aes 20.30, tal Teatri Gnûf Giovanni da Udine, cul spetacul conciert dedicât a Zorç Ferigo (viôt l’articul a pagjine 10, ndr). Dut il rest dal programe lu podês cjatâ sul sît de filologjiche: www.filologicafriulana.it.  ❚
✒ Alessio Screm