SLOVENIE. Il «Troi de pâs» e chês altris candidaduris UNESCO

Otignî il ricognossiment Unesco pal «Troi de pâs des Alps al Adriatic – patrimoni de Prime Vuere mondiâl». Al è chest l’obietîf dai promotôrs de iniziative – in primis la Fundacija Poti miru v Posočju (Fondazion Viis de pâs inte Val dal Lusinç) in colaborazion cul Comitât nazionâl pe celebrazion dal centenari de Prime Vuere mondiâl (2014-2018), Ministeri de culture, Ministeri de difese, Ent pe tutele dal patrimoni culturâl e Comission Unesco pe Slovenie – che e gjolt de plene poie ancje dai aministradôrs e atôrs locâi. L’intindiment al è chel di contribuî a preservâ i monuments e di promovi ancjemò di plui il turisim culturâl, calcolât, intune cun chel vert e chel sportîf, une des plui impuartantis oportunitâts pal disvilup dal teritori.
Il troi de pâs al è stât metût uficialmentri inte liste propositive de Unesco (la liste dai sîts che ogni Stât membri, firmatari de Convenzion al vûl iscrivi intal arc dai sucessîfs 5-10 agns) ai 8 di Fevrâr, inte zornade de culture slovene, aniversari de muart dal poete sloven France Prešeren. Il troi, screât in maniere uficiâl intal Març dal 2015, al partìs di Log sot dal Mangart e al finìs a Duìn, e al è lunc plui o mancul 230 chilometris.  Al passe fûr pes cimis des Alps Juliis intal Alt Lusinç, pe zone di Gurize e pal Cjars fin a Triest e fin aes spuindis dal mâr Adriatic.
Il troi al è stât realizât inte suaze di un progjet transfrontalîr finanziât de UE (lead partner e je stade la Provincie di Gurize, la idee e je partide invezit de Fundacija Poti miru v Posočju) e al unìs la ereditât naturâl e storiche, i ents e lis personis ator de linie dal front dal Lusinç, dulà che dai 23 di Jugn dal 1915 ai 9 di Novembar dal 1917 si àn combatudis dodis bataiis.
La zone e je plene di museus tal viert in chê che e jere la linie taliane e austroongjarese dal front.
Propit di pôc e je stade publicade de fondazion, ancje par talian, la vuide Il Sentiero della pace dalle Alpi all‘Adriatico, disponibile te sede de istituzion, intal centri visitis a Cjaurêt (plui informazions su www.potmiru.si).
La Unesco fin cumò e je stade pôc disponibile a ricognossi tant che patrimoni de umanitât i sîts peâts aes vueris e e je daûr a preparâ un dibatiment par cure di un grup di esperts propit su la ereditât scure des vueris dal vincjesim secul. La propueste de Slovenie però, che si augure di otignî la partecipazion ancje di Italie e Austrie a cheste iniziative (i contats a son stâts za inviâts), cussì come pal progjet european concludût intal 2015, e je incentrade suntun messaç di pâs, convivence e colaborazion.
Cumò la Slovenie e à inte liste propositive altris cinc candidaturis: il Cjars classic, i cjampeis di Fužine a Bohinj, l’ospedâl partesan Franja, i faêts e la architeture umanistiche e cence timp di Jože Plečnik a Lubiane e Praghe. Par trê di chestis, i dossiers pal ricognossiment Unesco tant che patrimoni de umanitât a son stâts za consegnâts o a son in fase di preparazion. Trê a son invezit i sîts za declarâts patrimoni mondiâl: lis Grotis di Sant Canzian (Škocjanske jame), lis palafitis dal insediament preistoric intal palût Ljubljansko barje (intune cun altris sîts simii intes Alps) e, – ancje in chest câs si trate di une nomine transnazionâl – il Patrimoni dal Mercuri: Almaden (Spagne) e Idrija. ❚
Tjaša Gruden