EDITORIÂL – 1420-2020: il Friûl al torne al Venit. Vignesie e sta preparant l’aniversari

II letôrs de La Patrie dal Friûl dal sigûr a san ce che al è sucedût intal 1420, e a chei che no san ur al conti: la Serenissime Republiche di Vignesie, che e stave cressint di podê e di fuarce, e je rivade in Friûl sdrumant Aquilee, e à fat colâ il patriarcjât, puartât vie Sant Marc e fat deventâ il Friûl un teritori di sô proprietât di podê doprâ seont il propri plasê par cualchi secul di storie.
_Il timp al è passât ma Vignesie no à mai dismenteât chel teritori che al jere come il so curtîl di cjase, no à mai dismenteât chei servidôrs sotans pronts a riverîle in ogni moment, no à mai dismenteât il plasê di comandâ chel cjanton de Italie, e cumò la Serenissime e vûl tornâ a vê ce che i spiete di dirit: o ben di comandâ sul Friûl.
_E cussì e à za començât a preparâ la fieste dal aniversari.
Sîs secui daspò de prime invasion il Venit al torne ae concuiste, no armât cu lis lancis e lis alabardis come une volte ma cuntun esercit che al dopre la sclope de economie e cu la fuarce de politiche.
_Par chest motîf Sapade no torne al Friûl, pal fat che invezit al è dut il Friûl che al à di tornâ al Venit, e se nol torne di volontât proprie lu fâs jentrant inte macroregjon dal Nord-est, o dal Trivenit come che lu clame cualchidun. No vâl che i nestris politics cu lis cjacaris si disin contraris a chest gnûf ordin teritoriâl, inte realtât dai fats no àn mai fat nuie di contrari par restâ distacâts dal podê Venit, e si impegnin invezit tal svuedâ un pôc a la volte dut il valôr de nestre piçule autonomie. Che a sedin di drete o di çampe no si viôt diference, lis corints politichis dal Venit a son plui fuartis di chês furlanis, e timp indaûr ancje Salvini e Tondo a àn mostrât plasê su la idee des 3 Venezie.
_I neozamberlans dal PD che a stan guviernant cumò e che si son metûts cuintri Sapade no stan fers a cjalâ e a van incuintri al aniversari vierzint la strade a Vignesie; i zamberlans a jerin i furlans filovenezians che a judavin i lagunârs in cambi di une poltrone di comant su la provincie furlane.
_Al baste viodi la storie dal ospedâl di Tisane che al ven sierât un toc ae volte par fâ cressi chel dongje di Puart, in provincie di Vignesie. O se o volês viodi la vicende dal vin Pinot che al varès di deventâ di denominazion uniche venete; o pûr Autovie Venete che biadelore dopo de tierce corsie e darà reson al propri non, trasferint la sede dai crets di Triest ae lagune di Mestre; lant indevant cul aeropuart di Roncjis di Monfalcon che nol rive mai a cressi cun ducj i bêçs che si spindin e che al ven scjafoiât di chei di Vignesie e di Trevîs. Ancje la Fiere di Pordenon cun dut il mont industriâl e cjale plui di là de Livence che no di ca dal Tiliment.
_Cussì, il program de celebrazion dal aniversari al è bielzà pront, cumò e mancje dome la bande musicâl che e compagni il corteu dal Doge Zaia che al jentrarà a Udin di puarte Manin. Ma o soi sigûr che cualchi musicist volontari si cjatarà in pôc timp. ❚
✒ Luca Zoratti