SLOVENIE. L’incuintri anuâl fra slovens al jude il rapuart fra i popui, ancje te storie

Intal segn de amicizie e de colaborazion e inte riafermazion de libertât di circolazion des personis, si è tignût ancje chest an il tradizionâl incuintri di principi an tra i slovens de provincie di Udin e de vicine Alte val dal Lusinç. L’avigniment, organizât pe prime volte intal 1970 tant che un incuintri tra un numar esigui di personis che, tant prime che a colassin i confins, a crodevin intal disvilup comun dal teritori transfrontalîr e des comunitâts leadis des stessis lidrîs, si è trasformât cui agns intune grande manifestazion politiche (chest an l’ospit di onôr al è stât il ministri dai forescj sloven Karl Erjavec) e culturâl, che e permet l’infuartiment des relazions, la cognossince tra popolazions vicinis e che e contribuìs ae eliminazion dai prejudizis e des barieris mentâls.
za di cualchi an si scomence cuntune taule taronde che i partecipin i aministradôrs locâi de fasse confinarie de provincie di Udin e ancje i rapresentants dal guvier sloven e di chel de Regjon Friûl-Vignesie Julie (chest an, a son stâts presints il ministri sloven pai slovens tal forest Gorazd Žmavc e l’assessôr regjonâl aes financis Francesco Perone) par discuti di gjestion e disvilup comun dal teritori. Chest an, viodude la aprovazion resinte dal program di cooperazion transfrontaliere Interreg V-A Italia-Slovenia de bande de Comission europeane, l’incuintri al è stât la ocasion par meti lis basis e presentâ ciertis propuestis operativis a pet de programazion europeane 2014/2020. La Slovenie e je une dai stâts plui eficients intal doprâ i fonts di coesion europeans: al cuart puest par ce che al tocje il periodi di finanziament 2007-2013 cun plui di 5.000 progjets sostignûts che a àn creât plui di 45.000 puescj di vore, ma i invistiments a àn cjapât dentri plui di 610.000 personis.
i sindics dai comuns des vals dal nadison al incuintri a àn presentât un document comun che al fâs riferiment ae letare di intindiments firmade a Madone di Mont di rapresentants di ents publics cjapâts dentri inte aree transfrontaliere intal 1999, cul fin di planificâ in mût plui zovevul i progjets di disvilup. Ve lis propuestis concretis evidenziadis dai aministradôrs de Sclavanie: lâ indevant cun iniziativis za inviadis tant che il Progjet Bimobis (percors circolâr turistic), il Parc dal Nadison, flum ritignût prioritât ambientâl, progjets tant che Prostor kostanja-Terra di cjastinis, Uelije (sul vueli di ulive) e Farmeat “cun atenzion particolâr ae valorizazion des produzions locâls e des biodiversitâts, ipotizant un progjet strategjic unitari pal setôr primari”. Infin, atenzion pai progjets culturâi tant che chel de Fondazion Poti miru dal Troi di Pâs.
al va sotlineât che, intai agns di contrast tra jugoslavie e italie, i contats tra i aministradôrs locâi de fasse confinarie de provincie di Udin dispès a son stâts facilitâts, se no promovûts, de comunitât slovene locâl. E cussì a son lâts indevant in mût costant dopo che intal secont dopovuere par plui o mancul un deceni i rapuarts tra lis popolazions a son stâts fermâts. La azion e rimonte al principi dai agns Sessante, cul prin incuintri tra il Comun di Cividât e chel di Tulmin (intai agns dopo i rapuarts si son slargjâts ancje a chês altris aministrazions). ❚
Tjaša Gruden