CJARGNE. Il personaç: Lavinia Garibaldi

Zovine minude, cjavei bionts peâts a code di cjaval, muse cun lineaments dolçs: cussì si presente Lavinia Garibaldi. Lavinia e à 28 agns e di siet e lavore te forestâl. E stave studiant te facoltât universitarie ‘Ambient e Nature’ cuant che e à decidût di fâ il concors. E je rivade a jentrâ e, intun prin moment, e à cirût di lâ indevant cui studis, ma dopo un pôc ju à molâts par dedicâsi dome al lavôr. “In principi o jeri a Comelians – e conte –  dopo a àn sierade la stazion e o soi lade a Vile (cun 10 comuns di stâur daûr) e par finî mi àn mandât a Paulâr. Achì o ai vût problemis seris e o ai scugnût lâ par un periodi a Tumieç.”
Par une femine nol è facil un ambient cun tancj masclis, ma Lavinia e je une zovine convinte e no si fâs meti sot i pîts. Tes sôs venis al zire un ciert sanc: de bande dal pari e je parint ae lontane dal storic Garibaldi, e il nono materni al jere un garibaldin e partigjan. Plui di cualchi coleghe i à fat presint che no podarà mai fâ cariere, no dome pal fat di jessi femine ma soredut pal so caratar, e jê i à rispuindût: “No mi interesse di fâ cariere! Mi plâs jessi coerente cun ce che o pensi.”
Il so lavôr al è complès: “controi su pe cjace, su pe pescje, sul legnam, didatiche cui fruts. Ogni dì o rilevìn tai riui di Paulâr la temperadure, la altece de nêf e vie indevant. Di Invier o din une man tai socors des pistis di schi. O tignìn di voli scovacis, flore e faune, o lin a recuperâ i nemâi ferîts. Ogni tant o soi ancje in ufici. Se e je la passion, si fâs dut e si sopuarte. Sul lavôr nô feminis si din tant da fâ ma o sin valutadis dai oms al minim; ma par fortune no ducj a son compagns. Jo o ai passion di chest lavôr che, cul gno paîs di Paulâr, al è il plui biel dal mont e o sieri un voli se alc nol va ben.”
Lavinia e à une fuarce di volontât grande; i siei problemis di salût (e convîf di agns cul diabete) no son mai stâts un vincul, anzit a son stâts un stimul par tignî bot, magari strenzint dispès i dincj ma cjatant la fuarce ancje di dedicâsi aes sôs passions: fâ garis di corse, scrivi poesiis, regonâ i lens, curâ l’ort di cjase sô e viodi dai siei fradis. ❚
✒ Marta Vezzi