Il moment di aur des scuelis cjargnelis

Un moment di aur chel che a son daûr a vivi lis scuelis di Tumieç. Un lusôr che al fâs ben sperâ pal doman de Cjargne e no dome. Doi dai istitûts principâi de citadine, di fat, a stan metint adun percors e ufiertis formativis che a rivin a fa diplomâ fantats bielzà pronts pal mont dal lavôr, ma di chel lavôr che al à bisugne il teritori, ven a stâi il turisim e il mont dal len.
fevelant par esempli dal cors alberghîr dal linussio, nassût dîs agns fa in gracie di un grup di insegnants che a àn volût crodi al progjet, si è rivâts a numars impuartants: il 50% dai students che si diplomin al cors a cjatin lavôr prime di sîs mês, il 15% adiriture dopo doi mês de maturitât. Une scuele, chê tumiecine, che a son daûr a ricognossile tant che un “brand” in dute la regjon: al baste pensâ che i gnûfs iscrits a tachin a rivâ di Udin, de Culinâr, dal Venit.
In dîs agns di storie, il Linussio al à dât fûr cogos, camarîrs, bariscj di nivel, che si fasin valê in ristorants stelâts, hotel dai plui nomenâts, e bar di mode. In plui, cualchidun al à intindût continuâ il so percors di studi lant ae universitât, e ancje in chest câs fasint fevelâ di se.
il merit di ducj chei sucès al è naturalmentri dai insegnants, des colaborazions che la dirigjence scolastiche e je rivade a tiessi tai agns, dai rapuarts cul teritori e di un laboratori di cusine di avanvuardie, nancje a fâlu a pueste dedicât ae memorie di Gianni Cosetti, l’Ors di Cjargne, il cogo plui famôs che cheste tiere al vedi vût te sô storie.
dongje dal linussio, e je daûr a cressi une altre realtât di ecelence, il solari, dulà che tai ultins agns si à rivât a meti dongje un pâr di cors inovatîfs a nivel regjonâl e nazionâl. Il prin câs al è chel leât aes tecnologjiis dal len pes costruzions, une opzion che e je rivade a interpretâ une des tradizions imprenditoriâls plui fuartis de mont, riscuvierzint dut sot di une lûs moderne e utile ai gnûfs contescj imprenditoriâi. La sperimentazion metude adun dîs agns fa cumò e je stade ricognossude in maniere uficiâl dal Ministeri de Istruzion e cun di plui copiade di bande di altris scuelis dal arc alpin talian.
il solari al à rivât a sburtâ ancje suntun altri setôr, chel dal agroalimentâr, midiant dal cors Servizis pe Agriculture e pal Svilup rurâl, che al ponte a riscuvierzi e a valorizâ produzions agriculis dal teritori dismenteadis o pôc svilupadis. E, tal stes timp, dongje di un progjet agricul si zonte une gnove prospetive economiche, dant i struments ai students par rindi validis di un pont di viste economic chestis coltivazions, intune logjiche di filiere curte. Di resint, al è stât par esempli presentât un libri, La Carnia del Cibo, che al à rivât a no fâ dispierdi ricetis e storiis di prodots de Cjargne plui vere, de fertaie cul sclopit ae tale cu lis fricis e il siç, lis sopis e la panade. E po la Varhackara, i pendalons, il Saût, l’ont e i savôrs. Un libri definît dal professôr Enos Costantini, «fuartementri anti-american», parcè che al fâs scuvierzi culturis e aliments identitaris, preludi di une gnove «resistence alimentâr» che dome i zovins sot i vincj agns di chest teritori, ancjemò libars di pensâ cul lôr cjâf, a podaran puartâ indenant. ❚
✒ David Zanirato