La crisi dal stât nazion tal spieli di Spagne e Catalogne

Te storie catalane al è un tiermin che al torne fûr: pactisme, vâl a dî “patisim”, forme politiche fondade sul ecuilibri tra podê centrâl (une volte il re di Aragon, cumò il guvier di Madrid) e espressions politichis dai podês locâi (une volte nobiltât, clericât e borghesie, cumò partîts politics catalans).
La tradizion di dialic par cirî un ecuilibri condividût jenfri Catalogne e Spagne e je lungje, e e va indevant ore presint: nol è un dialic facil, che daûr dai nivei (aministrazion, economie, identitât linguistiche…) al cjape formis e al pant obietîfs diviers. In ogni câs par che al sedi un dialic a coventin ricognossiment dal interlocutôr e volontât (convenience) di intindisi. Chest dialic si è ancje rot, in moments li che la Spagne si è sintude une vore fuarte e e à dineât ae Catalogne ancje dome il status di interlocutôr: par esempli sot Franco o sot Filip V (sec. XVIII).
SPAGNE DEBILE
Cumò invezit o sin tune fase là che la Spagne e je tant debile: e patìs de crisi gjeneralizade dal stât nazion, e à za pierdût la plui part dai siei podês a favôr di organisims sorestatâi (UE, NATO, podês finanziaris). La sô reazion e je di gjavâ risorsis a cui che i sta sot, ma no ‘nd à simpri la fuarce e la capacitât.
Al è clâr che la Catalogne, cun dute la sô cjame di identitât, economie e pês demografic, e fasi resistence e anzit, simpri par reagjî ae crisi, e domandi plui autonomie.
I sprocs di indipendence a puedin puartâ a semplificâ masse: no si pues cjalâ il rapuart tra Catalogne e Spagne come une partide di balon, tignint par une scuadre o par chê altre. La storie resinte de Catalogne no je la lote eroiche di un popul dominât, che al cîr di riconcuistâ la sô libertât: e je pitost la storie di une nazion che si confronte cun secui di condivision politiche, economiche, culturâl e ancje linguistiche cu la Spagne. E in gjenerâl lu fâs une vore ben, in maniere civîl, vierte, pacifiche, inricjidore par ducj (robe che la Spagne in gjenerâl no capìs e no presee…).
LIS RESONS PAR SOT
Ce resons sono alore sot dai sprocs indipendentiscj?
Par desenis di agns l’indipendentisime al è stât presint ma minoritari in Catalogne (tor dal 20% chei che si declaravin indipendentiscj). Al jere tant plui vîf invezit tal confront polemic, massime tai ultins agns, parcè che ur convignive a ducj: ai partîts catalans, che a jerin autonomiscj e fevelant di indipendence a domandavin 100 par vê 10; ai partîts di Madrid, parcè che cussì, cul lôr eletorât, a fasevin la part dai difensôrs de Patrie. Chest zûc cumò i è scjampât di man al guvier di Madrid, ancje pe incapacitât specifiche dal prin ministri Rajoy.
NISSUNE TENSION
In Catalogne però no si respire aiar di tension: forsit si sint che cumò la peraule i tocje ae Spagne. Se e dimostrarà di esisti ancjemò come interlocutôr, la Catalogne e sarà pronte a tratâ.
La pression internazionâl pe unitât dai stâts europeans no frenarà lis aspirazions catalanis a democrazie e sovranitât, ma e pues puartâ Madrid a vierzisi di plui al dialic: svuedât dal alt e dal bas, o destinât al frazionament, il stât nazion al è daûr a dimostrâ di jessi un model superât de storie, no dome in Spagne. ❚
Sandri Carrozzo