Fontanini: “Al covente che si fasi la graduatorie pai insegnants di furlan”

In cont di scuele e insegnament dal furlan, al è stât un riclam impuartant di bande dal President de Provincie di Udin, Pieri Fontanini, che al à vût dit: “Al covente che la Regjon e ricognossi ai insegnants di furlan la stesse dignitât rispiet ai docents di chês altris dissiplinis, previodint ancje par lôr une graduatorie. Lis leçs che a tutelin il furlan a son in vore (leç statâl 482/99 e leç regjonâl 29/2007), ma no vegnin aplicadis ad in plen e la Governadore Serrachiani no si decît nancje a fâ jeve su la specialitât dal Friûl-Vignesie Julie che al podarès mandâ fûr leçs par so cont”.
E cussì, i insegnants di furlan a scuegnin spietâ il secont cuadrimestri par inviâ i lôr progjets didatics in classe e, no jessint previodût par lôr un orari dissiplinâr, a scuegnin domandâ ospitalitât intes oris di altris materiis, cun dute une serie di discomuts, massime se l’insegnant nol è un docent in plante organiche dal istitût.
LA MANCJANCE_In Friûl e je in vore une liste di insegnants di furlan, ma no je previodude par lôr une graduatorie, partant docents laureâts e specializâts cun tant di master o di cors di inzornament e cun esperience, si cjatin, cence distinzion, intune liste cun personis cun dome recuisîts di fonde. Un esempli: te Universitât dal Friûl al è in vore il “cors di perfezionament par insegnants di furlan intes scuelis plurilengâl” inmaneât dal Ateneu dutun cu la ARLeF, dulà che a son iscrits 70 insegnants  (pes scuelis de infanzie, primariis, mediis e superiôrs), un cors (a paiament) cun frecuence obligatorie di 300 oris tra lezions in aule, laboratoris e tirocinis, ma la Regjon no à metût in cont che al dedi ponts in graduatorie.
IMPEGN MALAPAIÂT_“Un impegn di chest gjenar – al à marcât Fontanini – nol pues jessi fat bon dome cu la consegne ai partecipants di un atestât di frecuence, che di fat nol compuartarà distinzions tra chei che si inzornin e chei che no lu fasin”. Diviers di chescj insegnants a frecuentin il “Cors di metodologjie Clil par furlan”, metût sù de Filologjiche furlane, pal insegnament di materiis curicolârs in lenghe furlane tai istitûts superiôrs. Chest al vûl dî che i insegnants di furlan si specializin, ma che la lôr formazion no ven fate buine. “La Regjon e à di fâ deventâ cheste liste alfabetiche – al siere Fontanini – une vere graduatorie che e ricognossi ai docents titui e percors formatîfs”. ❚
Redazion