ATUALITÂT – Biel fevelant di libris

Une schirie di incuintris cui autôrs vecjos e gnûfs di prose furlane che a fevelaran cun gjornaliscj e operadôrs culturâi, intune conversazion une vore informâl.
Organizâts de Libreria Friuli e patrocinâts dal Comun di Udin, i incuintris si davuelzaran par vot setemanis aes sîs di sere a Udin li dal Bar Feeling, devant de sede de Provincie.
La rassegne e je za tacade joibe ai 23 di Avrîl cun Manuela Quaglia, esperte di tradizions e ancje colaboradore de La Patrie dal Friûl, che e à presentât il so ultin libri, «Il balcon de memorie». Po dopo si è lâts indevant, joibe ai 30 di Avrîl, cun Dario Zampa e il so gnûf libri «Contis contadis» e joibe ai 7 di Mai cun Adriano Del Fabro e l’incuintri intitulât «Friûl: un mont di tradizions».
Chei altris apontaments che si davuelzaran di chi indevant a saran vinars ai 15 di Mai, li che si fevelarà di traduzions in marilenghe di oparis de leterature foreste. Carli Pup al fevelarà dal so «Il diari di Bobby Sands» e Luca De Clara dal so «Il cjasâl dai animâi», di George Orwell.
Joibe ai 21 di Mai Stefano Montello al presentarà il so Manuâl critic pal ort, che o vin fevelât tal numar de Patrie di Zenâr/Fevrâr. Un altri autôr che o vin za tratât su lis nestris pagjinis al è Fulvio Reddkaa Romanin, protagonist joibe ai 28 di Mai cun «NIARI – Two pulp tales». Pe ultime part de rassegne si tornarà ae storie cun «Cercando Rommel» di Lino Leggio, che al sarà presentât joibe ai 4 di Jugn.
L’ultin apontament di joibe ai 11 di Jugn, al sarà cuntun inedit: il gnûf libri di Checo Tam «Scûr di lune». Une racuelte di contis scritis intun stîl gotic e ironic, che al da ae opare di Checo Tam alc di unic.
Dree Venier