FRIÛL EUROPE. Cirî il Friûl e cjatâ la Europe, cirî la Europe e cjatâ il Friûl

Cuant che si cîr il Friûl si cjate une vore dispès la Europe e cuant che si cîr la Europe si cjate une vore dispès il Friûl. Lis stessis rivendicazions che a tocjin il Friûl tant che «Patrie» cence etichetis, ven a dî ni «piçule» e ni «extralarge», tant che tiere multilengâl e multiculturâl e tant che spazi di citadinance fondade sul dirit ae diversitât, si pues ricognossilis, in concret, tant che rivendicazions di ispirazion europeane e europeiste. In particolâr, cun riferiment ai ultins cent agns, al è pussibil vualmâ cheste ispirazion in pinsîrs, ideis, mobilitazions e azions di caratar sei culturâl che politic: tant a dî che  pensâ e fâ alc a pro dal Friûl al è stât – e al è ancjemò –  pensâ e fâ alc a pro de Europe e cjalant la Europe.
Chest argoment al ven frontât ancje inte suaze di un progjet di ricercje alì de Universitât dal Friûl,  là che a vegnin metudis in relazion esperiencis diviersis, che però a àn trê carateristichis di fonde: la atenzion pal Friûl, chê pe Europe e il leam tra Friûl e Europe.
In cheste suaze al è facil cjatâ un puest, par esempli, pe figure di Achille Tellini cu la sô vision dal Friûl e de Ladinie, madressude soredut a tacâ de Prime vuere mondiâl, e cu la sô ipotesi di une federazion europeane des minorancis e des nazionalitâts. In cont di autoguvier e Europe, la impuartance di Tellini e cjatarès conferme ancje intune testemoneance di Gustavo Malan, un dai siet firmataris, ai 19 di Dicembar dal 1943, de innomenade “Carta di Chivasso”, che vincjecinc agns indaûr al contave di vê cjatât la peraule clâf «autonomie» propit dentri di une publicazion furlane dai prins agns Vincj dal Nûfcent.
Achì a àn par sigûr une lôr colocazion ancje i doi fondadôrs de “Patrie dal Friûl”, Felix Marchi e Josef Marchet. Chel istès al vâl pe partecipazion di une delegazion furlane ae cunvigne di fondazion de FUEN (la Union federaliste des nazionalitâts de Europe), ai 10 di Avrîl dal 1949, pai contats mantignûts cun chê organizazion in particolâr de bande di Etelredo Pascolo, pai riferiments ae dimension europeane fats in diviersis ocasions de bande di Fausto Schiavi e pe presince di rapresentants furlans, tal Paîs Basc,  ai 12 di Jugn dal 1988, pe firme dal Manifest di Gernika, pe Europe dai popui, in alternative a chê dai stâts.
La Europe e je un pont di riferiment ancje pe normative di tutele di lenghe e dirits. Al è emblematic il câs di chê che e sarès deventade la Leç regjonâl 15/1996, fate buine intune prime version ancjemò ai 27 di Setembar dal 1995, ma fermade dal Guvier par vie che e jere masse europeane, cun chei riferiments cussì fuarts ae Cjarte des lenghis minoritariis dal Consei de Europe, che e spiete ancjemò di vignî ratificade de bande dal Stât talian.
Ancje in dì di vuê, sei pes mobilitazions che pes normis che a chês ur dan rispueste e soredut pe lôr metude in vore, la presince o mancul di riferiments ae Europe e di coerence o mancul cui standards europeans a son un indicadôr in cont de lôr justece a pro dal Friûl. ❚
Marco Stolfo