ASSEMBLEE 1975, IL DOCUMENT FINÂL. Document dai predis de Diocesi di Udin pe lôr int

I predis de diocesi di Udin, dâts dongje cul lôr vescul in assemblee plenarie ai 25-26-27 di Jugn dal 1975, dopo di jessisi impegnâts a font su lis problematichis religjosis e pastorâls de lôr mission di predis, a àn crodût lôr dove di proponi ae atenzion di chei che a crodin e di chei che a àn a cûr il ben de lôr tiere un pocjis di riflessions a rivuart de glesie locâl e dal contest sociâl dulà che e je insedade.
Lôr partant:
A – A afermin, in comunion cun dute la glesie, la funzion specifiche di cheste lôr glesie locâl che e je chê di contâi al mont la salvece in Crist e di proclamâ la veretât e la pâs par ducj i oms di buine volontât.
B – Dutune cul lôr vescul, a rispietin lis sieltis politichis dai oms, cence butâsi in concorence o tignî man a partîts, e chest par podê restâ tal lôr puest e judâ i oms a vivi la lôr storie, liberantju di ogni paronance e clientelisim, dant il bon savôr religjôs ae lôr vite e restant lûs dal mont e sâl de tiere.
C – A tornin a bati sul dirit e su l’urgjence che il vescul, cun dute la comunitât diocesane, al disi publichementri la sô ancje su cuistions sociâls, cuant che chest al diven di profondis esigjencis umanis.
In particolâr:
1 – A son convints che chei che si strussiin tai svariâts lavôrs e che a stimin il lavôr come fonde dal ben di ducj a àn dirit di dî la lôr e di sintîsi part integrant de glesie, pe ricjece che i puartin; soredut:
– a presein chei predis che van a vore,
– si metin de bande des organizazions sindacâls e parasindacâls cuant che a difindin i dirits dai lavorents,
– si sintin in plen di lavorâ cun ducj chei che si sacrifichin par vie dal just, a ogni nivel: in sede locâl, statâl e internazionâl.
2 – Si sintin impegnâts par jessi presints a fâ alc di concret in chês situazions là che al mancje alc e che e covente, pal moment, une suplence tal setôr caritatîf, assistenziâl, culturâl, sburtant tal fratimp par che i problemis a vegnin disberdeâts in sede politiche.
3 – Considerant l’emigrazion e l’imigrazion fats dolorôs e peâts ae industrializazion sfuarçade di cualchi zone de tiere cul abandon di chês altris ae depression, e di secui cjapâts dentri cul scugnî lâ vie de lôr int, ur proponìn a di chei che a àn responsabilitât e podê politic:
– di incrementâ i puescj di vore te tiere furlane,
– di sfrancjâ il Friûl di chês sclavitûts militârs e nainis burocratichis che a scjafoin il so normâl svilup,
– di proviodi come cu va, in mût che chei che a tornin a puedin reinserîsi te lôr int, sintintsi tal fratimp dutune cun chei predis che a son pal mont par assisti, come predis e come oms, i emigrants.
4 – A fasaran in mût che chei che a àn sielzût di plantâsi in cheste glesie, dopo di vê bandonade la lôr riunde, a cjatin un biel acet, justizie e solidarietât, domandantjur però di vê rispiet pai valôrs de tiere che a son ospits.
5 – Cussients di partignî ae “Patrie dal Friûl”, vere e proprie nazion, di fat cjapade dentri te struture dal stât talian, i predis a domandin che al vegni protezût il patrimoni culturâl dal Friûl di ogni tentatîf di nivelament e di messedament disonest, pretindint in particolâr che:
– la lenghe furlane, e compagn pes zonis là che si doprin, la slovene e la todescje, e sedin lassadis libaris tes glesiis, a vegnin metudis tes scuelis e a vedin place ancje tal aradio e te television,
– si rispietin e si ur dedi une man a ducj chei che, cence lassâsi doprâ di nissun, a lavorin e si impegnin par valorizâ dut ce che di so cheste nestre tiere e à produsût e e prodûs ore presint.
6 – Si metin de bande di chei che a lavorin tal mont de culture, di chei che a lotin par che a vegni fate l’Universitât furlane, di chei che si impegnin, seont i principis de justizie, par valorizâ la scuele, cence dismenteâ la scuele libare no statâl, e in plui:
– a cjalin al progrès sientific e culturâl come ae strade drete par che l’om al puedi afermâsi come persone, ancje in sens religjôs,
– a vierzin bibliotechis, archivis, locâi de glesie udinese a vantaç di ducj.
Par concludi i predis de diocesi di Udin a son convints che no si pues predicjâ il vanzeli cence metisi dentri inte storie e partant si impegnin a studiâ plui a font i problemis fin chi tratâts, par cjapâ une vere e autentiche responsabilitât no dome in glesie, ma ancje tal cjamp sociâl e culturâl, in mût che ducj a sedin a part dal ben comun, ancje chei che cumò a son metûts di bande. ❚
Udin, ai 27 di jugn dal 1975
Il moderadôr: pre Gjldo De Santa