L’Istât a Museis di Renato Garibaldi, pont di riferiment culturâl in Cjargne

Di un pâr di agns incà, undis pe precision, al è deventât un pont di riferiment par cui che di Istât nol vûl rinunziâ al confront e a inricjîsi di culture. Il Bosc di Museis a Çurçuvint, fuartece dal apicultôr e spirt libar Renato Garibaldi, al propon tai mês di Lui e Avost “Cerviei in moviment”, un program di apontaments un grum interessants su tematichis di atualitât, imboconadis di riflessions e oportunitâts di dibatit leât ae storie e aes tradizions de nestre tiere. Teme centrâl di cheste edizion la Vuere e lis cuistions leadis ai dispatriâts. “Come simpri – al spieghe Garibaldi – la manifestazion si organize in gracie dal volontariât e cence sovenzions o condizionaments. Partecipâ al vûl dî condividi un progjet che al fonde lis sôs lidrîs te solidarietât, te cognossince universâl, te spiritualitât. Si incuintrin personis che a crodin in valôrs reâi e a tentin di promoviju ancje se a somein fûr mode, cirint di fâ rêt cu la bande sane di cheste societât che simpri di plui e cole a tocs”.
Par esempli, ai 19 di Lui, in ocasion de fin dal Ramadam, e je stade promovude in colaborazion cul Centri Balducci di Çuian une zornade par fâ incuintrâ i migrants di diviersis nazionalitâts, fâju mangjâ insiemi ae comunitât locâl in maniere multietniche e resonâ ducj unîts su pes prospetivis des migrazions. Une rispueste indirete al Vescul di Udin che tai mês passâts al veve clamât adun dome i migrants catolics. Pal mês di Avost, sabide 8, si discutarà des conseguencis de Prime Vuere Mondiâl su pal popul furlan e su pe sô profugance in dute Italie. Vinars ai 14, invezit, al tornarà l’apontament cu la Musiche tal Bosc dulà che si podaran esibî diviers grups musicâi; ai 21 protagoniscj a saran i Cosacs e la lôr storie ingredeade cun chê dai cjargnei; finâl l’ultin vinars di Avost cuntune grande fieste. Par tignîsi inzornâts al è a disposizion il sît internet www.boscodimuseis.it ❚
David Zanirato