MUSIS DI…FACEBOOK. Bufulis sul Muselibri: il scandul de scancelazion de pagjine Friûl da la enciclopedie Wikipedia finît in nuie

Il mês stât, ae fin di Mai, intant che o jerin in stampe, su Wikipedia, la enciclopedie partecipade in internet, si sierave une cuistion che e veve fat scaturî plui di un furlan ator pai “social” e cualchi sît on line. Cumò us contìn cemût che e je finide.
Ce jerial sucedût? Un aministradôr di Wikipedia al veve proponût la scancelazion de pagjine “Friuli” da la enciclopedie, par vie che tes informazions contignudis la plui part e jere su la regjon politiche Friuli-Venezia Giulia e duncje no justis, jessint il Friûl une regjon storiche e no politiche (almancul fin cumò). La critiche e veve mani, al plui l’aministradôr al podeve fâ saltâ fûr la cuistion in maniere divierse e no proponint la scancelazion, ma nol jere nuie di dramatic. Viodût l’anunzi de procedure di scancelazion, in tancj si son metûts a sberlâ come se al fos stât un atac al Friûl e un pericul: «”Friuli” rischia seriamente di essere cancellato da Wikipedia», al à titolât cualchidun. Pecjât che al jere clâr che si tratave plui di une propueste “tecniche”, e che se si cognossin un tic lis proceduris di Wikipedia si sa che e à i anticuarps par fâi cuintri a cualchi aministradôr “creatîf”. Wikipedia, fate cui contribûts dai letôrs, e je une robe serie e ben fate: une statistiche di timp fa e diseve che e à mancul erôrs de Enciclopedie Britaniche (un model par ducj). Par esempli, e je tant serie che la vôs “Friuli-Venezia Giulia” le scrîf come che e dîs la Costituzion, cul tratut, e nissune discussion e à podût cambiâ la definizion, jessint impecabile.
E cussì, ancje pe vôs “Friuli” la enciclopedie si è mostrade serie e dut al è finît in nuie, sclopât tant che une bufule: la pagjine e je stade modificade cun tescj che a fasin riferiment al Friûl regjon storiche e no je stade scancelade. Nus displâs notâ che in tancj furlans a vedin sberlât e vaît par nuie, cence lâ a viodi cuale che e jere la cuistion. Compuartaments che par solit cuant che si viôt che ju fasin altris si critichin. Cun di plui, chei che a vevin tant agjitât il pericul, po dopo no àn procurât di informâ di cemût che e jere finide. ❚
Dree Venier