ATUALITÂT – Sporteliscj ancjemò in spiete

Di no crodi, dopo agns di vore, ma sore il dut di leçs a pro le lenghe furlane, contant la leç regjonâl dal 15/96, po chê nazionâl, la 482 dal ‘99, e la ultime rivisitazion dal test regjonâl fate dal 2007, se si à voie di vê une mape precise dai sportei in marilenghe atîfs in regjon nol è po cussì sempliç.
A vêlu sperimentât par prins a son stâts i stes sporteliscj che, par dâsi dongje ai 4 di Avrîl stât a Aquilee intun moment di confront e di condivision, no àn vude strade facile tal meti adun i nons dai coleghis di invidâ.
Responsabilitât prime, la grande precarietât che sportei e sporteliscj si cjatin a vivi, tra un contrat e chel altri, tra un comun che al à la pussibilitât di vierzi il servizi ma no lu à ancjemò inviât o chel che lu à daviert e po sierât par tornâ a rinovâ la burocrazie che e covente a mandâlu indevant.
La riunion di Aquilee, dut câs, tai intindiments no voleve jessi un ocasion par vaîsi intor, si ben par meti in lûs i aspiets positîfs des esperiencis che si puartin indevant, cun fadie e passion, no cate lis dificoltâts di programazion par vie di prospetivis simpri balarinis.
A jerin presints i sporteliscj dai comuns di Reane (dulà che cumò il servizi al sta par sierâ), Tavagnà, Manià, Aquilee, Sudri, de provincie di Gurize, e lis dôs personis che a fasin servizi alì de ARLeF. In dì di vuê, dongje di chestis esperiencis si zontin chês dai sportei di Basilian, Buie, Remanzâs, Codroip, Maian (che di pôc al à tornât a vierzi), Voleson, e i sportei de provincie di Udin e di chê di Pordenon che, dopo un moment di polse, al è tornât atîf cul prin di Mai.
Confrontadis lis esperiencis, tai aspiets bogns e in chei mancul bogns, e seneôs di dâ simpri plui costrut ae lôr esperience a pro de lenghe e de culture furlanis, i sporteliscj riunîts a Aquilee a àn finît par meti in clâr che ce che al covente cun plui urgjence al è un coordenament dal servizi sul teritori.
Cussì a àn cjapade cjarte e pene e a àn decidût di scrivi al president de Agjenzie Regjonâl pe Lenghe Furlane e al diretôr dal Servizi Identitâts Linguistichis Culturâls e coregjonâi tal forest de Regjon, par fâ une lôr propueste.
Te letare, che e je stade inviade ancje ai coleghis che no jerin presints par che le sotscrivin, si rimarche soredut «la necessitât di un coordenament formâl, parcè che chel volontaristic e personâl dai sporteliscj, che pûr a àn simpri procurât di cognossisi e di cjatâsi in chescj agns di aplicazion de leç 482, nol è par nuie suficient».
Di chi, la propueste che e sei la ARLeF, tant che organisim di politiche linguistiche, a «coordenâ lis ativitâts dai sportei e che si fasi puartevôs li de Regjon dai problemis, des propuestis e des esigjencis che a vegnin fûr dal lavôr di sportel che – a rimarchin –, pe sô nature, al è simpri a contat cul teritori».
Seont i firmataris, in cheste maniere «i sportei a varessin la pussibilitât di un confront cun chei altris, midiant di un riferiment plui stabil e continuatîf».
E cumò, i sporteliscj a restin in spiete di un rispueste.
Antonella Lanfrit