MUSIS DI…FACEBOOK. Cu la scuse des vitimis si celebre la vuere: un piçul esempli “social”

Come che si podeve proviodi, la date dai 24 di Mai li che si ricuardave la jentrade de Italie te Prime Vuere Mondiâl e à puartât a tantis celebrazions di “orgoi patriotic”, plui che a visâsi dal event tant “l’inutil maçalizi”, tant che lu à definît Pape Benedet XV.
L’efiet che al pues puartâ dute cheste retoriche, e massime la storie contade intune cierte maniere, lu vin viodût in pratiche cuant che, apont pai 24 di Mai, nô invezit o vin metût su la nestre pagjine di Facebook la imagjin de cuviertine dal nestri mensîl cu la frase di pre Toni Beline «Si continue a celebrâ la vuere cu la scuse di celebrâ lis vitimis de vuere».
Al è sucedût che un utent al à tacât a comentâ disint che si celebravin i erois de Vuere Mondiâl, che lui al lave a Redipulie e si meteve a vaî par chei muarts, che a jerin muarts pe bandiere e vie indevant. Dut par furlan. Cuant che cualchi altri utent i à rispuindût cun cualchi dubi rispiet a dute chê retoriche tricolôr che al spandeve, al à scrit il test dal imni talian dut cul maiuscul zontant sot: «chestis a son lis peraulis di un fantat di vincj agns come me, muart scombatint par la Italie cuintri dal nemì!»
Nô i vin rispuindût: «Eco, tu someis propit pront par lâ in vuere: tu âs dimostrât la validitât des peraulis di pre Toni Beline».
La dì dopo il fantat al à scancelade dute la conversazion, che duncje no si cjatile plui. La sperance e je che lu veti fat no par dispiet, ma parcè che i sedi vignût sù cualchi dubi.
Chei dubis che nô come La Patrie dal Friûl no molarìn mai di stiçâ. ❚
Dree Venier
_________________
O vin ricevût e o publichìn vulintîr la poesie di un frut di Cormons a proposit de Grande Vuere, che al è rivât a piturâ benon chel grant maçalizi.
UN SACRIFICI DISMENTEÂT
Soreli, aiar
pâs e libertât.
Cuistade e paiade cul sanc.
Un ton, un lamp
Fum neri che si jeve lontan.
Nissun rumôr, dut al tâs,
dut ator une pâs.
Un sacrifici par un fi e par un pari,
une mari restade di bessole.
E cumò? Dut dismenteât.
Une pas paiade
no va dismenteade.
Liam Manzocco –  3 D – Istitût Comprensîf “G. Pascoli” – Cormons