Lis servitûts militârs a son une plaie che no si rive a parâle vie. Lis esercitazions su la Bivare si fasin ancje chest an

No je la prime volte che o fevelìn di ce che al sucêt des bandis di Sapade e Fors Disore e Disot.
La mont Bivare e je un dai sîts indulà che si davuelzin esercitazions e poligons di cetantis fuarcis armadis, sedi talianis che de NATO. Une situazion segnalade come critiche e pericolose plui voltis, sedi dai comitâts locâi, che dai citadins e dai aministradôrs de zone.
Il pericul al è clâr, cuant che si fevele di armis e di efiets su la faune. Zontant lis realtâts agriculis, di pascul e di produzion si pues capî che il dam si slargje. La Regjon e à “limitât” i periodis di esercitazion par dôs setemanis a Jugn e Otubar: in chei doi periodis la zone si siere par vie di chescj “zûcs di vuere”. Propit chest ultin concet al è stât plui voltis sotlineât dal sindic di Fors Disore, Lino Anziutti: «al è anacronistic – al dîs il Sindic – intun timp indulà che la vuere si fâs cui missii o i drons, che culì si doprin ancjemò sclopis, metraiis e bombis a man. Si gjavin magari lis casermis, ma si lassin lis servitûts militârs cun ducj i pericui e i impediments che a puartin”. Il sît, tra l’altri, al è tal elenc dal SIC (Sîts di Interès Comunitari), ma al pâr clâr che al è dome su la cjarte, parcè che nol somee jessi tutelât tai fats.
Al vâl la pene dî che tal poligon no lontan di Medun-Val Celine lis autoritâts militârs a àn confermade la presince di “metal pesant”: tradot in mût sempliç, ce che al reste di radioatîf di chel che al è stât sbarât.
Une conferme che no je stade mai dade pe zone de Bivare. Se si fasessin aciertaments, almancul, si podarès capî pluitost che scrupulâ.
In plui di cualchi ocasion a son stadis cjapadis sù firmis di proteste de int dal puest, ma il risultât al sta tes cronachis dai gjornâi. Lis autoritâts militârs e il comitât paritetic si fermin dome a marcâ che lis limitazions a son pe tutele de comunitât e che eventuâi risarciments a podin jessi domandâts in 30 dîs. Il fat che la int e domandi di no vêju par nuie, ven a stâi no vê lis esercitazions, nol pâr scjassâ plui di tant. Dut si risolf cuntune valutazion pai dams, tant a dî che dut al à un presit, int comprendude. ❚