Jessût l’elenc des 18 “Uti”. Fontanini al tone: “Triest nol si pues tocjâ, il Friûl fruçât”. E Provincie e Comuns a fasin ricors

Il mês stât al è vignût fûr l’elenc des 18 Uti (Unions teritoriâls intercomunâls), i ents che e varessin di sostituî lis provincis te gnove organizazion de Regjon. L’elenc al va de “Unione Giuliana” (cul numar 1, nancje discori!)  a la “Unione del Noncello” cul numar 18. Par fâi cuintri a cheste riforme 57 Comuns des provinciis di Udin, Gurize e Pordenon a an fat ricors devant dal Tar dal Friûl – Vignesie Julie cuintri de Regjon. E cumò si metarà dongje tal judizi ancje la Provincie di Udin proponint un at di intervent volontari “ad adiuvandum” a poie dai ricorints principâi sul anulament dai ats aministratîfs contestâts, par fâ valê i principis di autonomie, sussidiarietât, rapresentativitât e democraticitât une vore comprometûts de riforme dai ents locâi (leç 26/2014). “La gnove gjeografie dal Friûl – Vignesie Julie dissegnade de Regjon tal non di une plui grande eficience e razionalizazion, – al spieghe il President de Provincie di Udin Pietro Fontanini – e crearà cetancj disecuilibris teritoriâi a dam dal Friûl, cûr di cheste regjon, ma ancje pesantis consecuencis te organizazion, te ufierte dai servizis e te spese de machine aministrative che, magari cussì no, e cressarà smascarant il sparagn prometût ai citadins che si spietin propit chest dai aministradôrs”.
Fontanini al spieghe cualis che a saran lis consecuencis de gnove sudivision aministrative. “Triest e mantignarà il so status quo cun ents, beneficis e privileçs che no si puedin tocjâ; al cambiarà dome il non, di Provincie a Uti di Triest. Gurize e ven dividude in dôs Unions, Pordenon in cinc e la provincie di Udin e ven fruçonade in dîs realtâts inmò di verificâ e sperimentâ”. Cu la riperimetrazion fate buine de Zonte regjonâl a son lâts a patràs ancje i dissens dal Grant Pordenon e dal Grant Udin che a podevin in cualchi maniere tignî dentri lis consecuencis de riforme sul Friûl: “dome unions slargjadis e compatis tra la citât e l’hinterland – al comente Fontanini – a podevin fâ in mût di difindi i interès dal Friûl e fâi cuintri al indebiliment a pro de aree juliane che, invezit, di cheste division e ven fûr inmò plui fuarte”. ❚
Redazion