SIMPRI BOGNS. Adriano Nascimbeni, “Remo e sô fie”, Cormons, 2014

“Il muart al steve lunc distirât cu la panze par aiar sul prât e il sanc daûr de cope al veve za fat une piçule poce rivant a cuvierzi la gruesse piere che il sassin al veve doprât par crevâi il cjâf. Grant, grues e scûr, al someave un telamon colât jù dal cîl”

Cussì al scomence chest romanç bilengâl di Nascimbeni, editât de meritevule cjase L’orto della cultura di Pasian di Prât. Fausto Zof, inte introduzion, al fevele di un zâl a sfont psicologjic e sociâl. In efiets, la impostazion e je chê: il delit, il suspietât, i indizis e infin la veretât che e salte fûr in gracie di un personaç plui inteligjent di chei altris, che no si ferme aes aparencis, ma che al va insot tes robis. In chest câs, al è un avocat che al cjape sù chest assum e, stant la profession che l’autôr al à esercitât par scuasi cuarante agns, nol è dificil cjatâ elements autobiografics in cheste figure.
Zof al fevele ancje di une ‘conte dure, a voltis violente’. E chestis peraulis a descrivin ben la prime part dal libri, vâl a dî lis miôr pagjinis. La figure di Remo e je piturade cun precision psicologjiche e tintis mareosis. Si trate di un ‘loser’, si disarès in dì di vuê, di un pierdint, che al à vût vonde pôc de vite e che, cumò, rivât dongje de vecjaie, si viôt gjavât ancje chel pôc.
La conclusion e je consoladorie e il letôr al reste content par Remo. Ma il critic nol pues fâ di mancul di pensâ a ce esit che e varès vût cheste opare, se l’autôr al ves olsât di
evitâ l’’happy end’ e di continuâ inte vision pessimistiche de prime part; se, in sumis, il pierdint al fos restât un pierdint che cuintri di lui si incagnissin dutis lis fuarcis.
Nascimbeni al dîs, inte sô note preliminâr, che lui al scrîf pal gust di fâlu. E cence altri chest gust si lu cjate inte meticolositât che al dopre par contâ la storie dai personaçs che a jentrin di comparsis inte storie principâl (Tunine, Tite, Piu e parfin il cjan Filut). Se, po, un al à gust di scrivi, al vûl dî che al à let tant o, magari, viodûts tancj films. Ogni scritôr al devente, alore, un pôc canibal, intal sens che al fâs sôs lis esperiencis di leture o di vision che al à vudis. O scomet che Adrian al à vût viodût e assimilât il film Umberto D di Vitôr De Sica (il cjan e il so paron disperât) e chel di Vitôr Cottafavi Maria Zef (il prin film dut par furlan, li che il protagonist Siro Angeli al concupìs la gneçute Lisute). ❚
Laurin Zuan Nardin