Il Friûl nol dismentee il Tibet: ce che si sta fasint e cemût dâ une man

Dôs scjassadis di 7,8 e 6,6 grâts su pe scjale Richter, une dopo chê altre, cuasi dîs mil muarts aciertâts, miârs e miârs di ferîts, paîs e borcs di biade int che no esistin plui. Une tragjedie planetarie chê dal Taramot dal Nepal, sucedude ai 25 di Avrîl stâts. Un drame che al somee che nol vedi fin, stant che la tiere e à tornât a tremâ ancje ai 12 di Mai, puartant altris muarts e gnûfs rudinaçs.
Sans e salfs par fortune i siet furlans – cinc turiscj e doi volontaris – che a jerin restâts blocâts a Kathmandu propit in chei moments teribii: “une pôre impressionante, une devastazion incredibile” a àn contât a pene rientrâts in Italie, mancjarès altri, ancjemò strassunîts pal colp.
Dute la comunitât internazionâl si è metude in moviment par puartâ il propri jutori al popul nepalês e ancje dal Friûl no si è stâts cu lis mans in man, vint simpri iniment l’Orcolat dal 1976, che il so 39esim aniversari, par une brute burlade dal destin, si è celebrât propit tal mieç des dôs scjassadis.
I prins a metisi a disposizion a son stâts i volontaris de associazion “Friuli Mandi-Nepal Namastè”, ative dal 2005 – in gracie da la idee di Massimo Rossetto, tecnic de Snam Rete Gas di 58 agns, resident a Malborghet – che di chê volte e je rivade a fâ sù, midiant des ufiertis de int, ben cinc scuelis che a puedin ospitâ centenârs di fruts,  gjavâts vie de strade e de ignorance, cence dismenteâsi dai progjets in ambit sanitari e sociâl.
“Di chê esperience che o vin patît dal 1976 a son nassudis diviersis iniziativis, e une e je propit chê pal Nepal – al à sotlineât il President dal Consei Regjonâl Franco Iacop, in ocasion di une des manifestazions dal 6 di Mai – il nestri sfuarç cumò al à di jessi sedi chel di promovi un jutori concret, sedi chel di trasmeti sperance pal doman”.
Come simpri, la sveltece di intervent si è fate viodi e cussì i volontaris furlans trê dîs dopo dal taramot a son partîts subit pal Nepal par podê lâ diretementri a judâ la popolazion locâl. Des primis informazion che a àn dadis, al è saltât fûr un cuadri trement: muarts che a saltin fûr des maseriis ogni dì, int cence plui une cjase te disperazion plui totâl, fadie a cjatâ la mangjative e puescj sigûrs dulà passâ lis gnots. La uniche robe positive e je che lis cinc scuelis costruidis par merit de associazion furlane a son restadis in pîts.
La ricostruzion e je za tacade e, tant che prime robe, si sta pensant a tornâ a fâ sù lis stalis pai animâi, indispensabii pe sorevivence de int. Chê altre prioritât e je il risi, stant che si è in plene stagjon di semine. Pes cjasis si varà timp plui indevant, stant che si va viers la stagjon cjalde, ancje se il prin progjet che il grup di volontaris furlans a puartaran indevant al è propit chel de sistemazion de cjase dal referent nepalês de associazion, in maniere di vê funzionant il prin e principâl pont di riferiment pes diviersis ativitâts. Il progjet al è clamât “Cantiere Friuli 1”.
Par ducj chei che a volessin dâ il propri contribût, a son a disposizion un pâr di coordenadis bancjariis: CrediFriuli C/C EUR IBAN IT28K0708564290029210007592 Bic Swift CCRTIT2TK00; CiviBank C/C EUR IBAN IT87A0548464290019570000135 Bic Swift CIVIIT2CXXX; e il cont corint postâl 86120466 intestât a “Friuli Mandi Nepal Namastè”. La causâl: “terremoto Nepal”. ❚
David Zanirato