La pagjine Facebook de Patrie e à fat 5.000 iscrits: une prove che il furlan al viaze ben ancje su internet

A disin che te ete de globalizazion il furlan nol coventarès e che je une lenghe dal passât, ma invezit propit tal media simbul di cheste globalizazion, internet, il furlan al è simpri stât presint. Cui sîts tal imprin, cui blog, e cumò, che si fevele di internet “2.0” o “3.0” sui social network. In gracie de nestre rubriche “Musis di Facebook”, plui di une volte o vin fevelât dai furlans che a fasin robis sul “Muselibri” (cussì lu clamin in tancj) in marilenghe. Dentri di chescj, o sin ancje nô.
Il mês stât, ae fin di Avrîl, la pagjine dal nestri mensîl e je rivade ai 5.000 “mi plâs” (iscrits, in sumis). Al è un biel travuart, che nus met fra i prins fra i media regjonâi presints su Facebook. Chest social si è dimostrât un biel imprest par difondi la nestre riviste e par vê un rapuart plui diret ancje cui letôrs “de cjarte”: i nestris abonâts, che no finarìn mai di disiur graciis.
Us din cualchi cifre, come curiositât, a proposit dai iscrits ae pagjine. A son, di pôc, plui oms che feminis: 52% cuintri 48%, ma rispiet al totâl des personis su Facebook (54% oms, 46% feminis) o vin plui sioris, e nus fâs un grum di plasê. La etât plui rapresentade e je chê dai 34 ai 44 agns (11% dal totâl), subit dopo chei dai 45-54 e dai 25-34. L’85% al ven de Italie, ma o vin ancje tancj letôrs di fûr dai confins statâi. Cui vegnial dopo de Italie? Si pues induvinâlu, un lûc li che a son lâts in tancj furlans: la Argjentine (3% dai iscrits), pôc dopo la France, un tic stacade e ven la Svuizare. Sot di chest podi virtuâl, plui o mancul a pâr: Stâts Unîts, Gjermanie, Belgjiche e un stât propit di là dal mont, la Australie.
Fevelant de divignince par chel che al inten lis citâts, il 12% a son di Udin e dopo une sorprese: la seconde e tierce citât a son Milan (3,1%) e Rome (2,3%). Par viodi un comun furlan o vin di lâ in cuarte posizion cun Codroip e di cuinte o cjatìn une altre citât foreste… Triest. ❚
Redazion