Cui vuelial distudâ i Fogolârs furlans? Interviste al president Pittaro: «Lis parochiutis che si ocupin di emigrants a son masse: e coventarès une regolade». Intant a restin lis barufis

Fin a prime di fevelâi, no cognossevi nissun che al ves fat Friûl – New York in trê dîs, viaç in avion includût. Partît di sabide, tornât di lunis. Nissun: il prin al è Pieri Pittaro, 80 agns, president “in prorogatio” (la definizion se je dade lui stes) dal Ente Friuli nel Mondo. Si è puartât daûr la femine (“che il biliet sal è paiât di bessole… jê e je pensionade, e pues!”). E la puarine, no i à fevelât par cualchi dì, pal strapaç di chel svol intercontinentâl. Si capìs, e varà vût di fâ e di viodi dut di corse: nancje il timp di une spassizade tal Central Park. Juste la inaugurazion di un event cui furlans di là vie, e di corse: la visite al One-Wtc, il palaç tirât sù di Mario Collavino, smontant li de fermade de metro, imbastide de Cimolai. Simpri di corse: un zîr di clamadis al telefon ai amîs che a vivin tai States, che za si scugnive jessi al check-in dal aeropuart JFK. “Ah!, no stait a fâmi meti nancje un poleâr te aghe, ma pai aeris o voi mat. Mi met la mascarute e o duar dut il timp”. A scrivi di Pittaro e dai siei fatarei ator pal mont, no bastarès une edizion de Patrie. E dut câs, il cantin de “furlanetât tal mont” al bol simpri.
La ultime cuistion e je une polemiche cul Efasce (Ente Friulano Assistenza Sociale Culturale Emigranti – Pordenonesi nel mondo), apont di Pordenon, daspò lis declarazions, a mieç stampe, dal so president Michele Bernardon (lei articul chi dongje). Dit sclet, al ven un dubi: nol è che dute cheste vicende, dut chest cavilâsi fra associazions, ae fin nol deventi un pretest par sierâ ducj e dut? Pieri Pittaro al da sù: “Noooo, no, no… jal siguri. Chi nissun al vûl cidinâ nissun, cun di plui il grant patrimoni dai furlans pal mont. Purtrop al è dut un zûc di “parochiutis”, che di mieç si è metude la politiche. Politiche che prime lis à ricognossudis, chestis parochiutis, par vie che i faseve comut cussì, e che cumò no rive a guviernâ, parcè che si viôt che e à interès a tignîlis”.
Antecedent: lis parochiutis in cuistion no son altri che chês altris cuatri associazions ricognossudis de Regjon Friûl-VJ par pupilâ e par stâur daûr ai coregjonâi tal forest. Baste cirî su internet. Delibare 372 dal 2012. Burocratês: “Viodude la leç regjonâl numar 7 dal 2002 (Zonte Tondo I), gnove dissipline dai intervents in materie di coregjonâi tal forest e rimpatriâts, la Zonte regjonâl ae unanimitât (Zonte Tondo II) e delibare il ricognossiment di sîs sogjets”. E fra chescj, i furlans a ‘nd àn cuatri di riferiment: in plui dal Ente Friuli nel Mondo e dal Efasce di Pordenon, a son ancje Eraple, che e fâs cjâf ae Acli, e la Alef, che e je te cjase de Cgil.
Pittaro al dopre la metafore des “parochiutis” propit par spiegâ e justificâ chês che a son secontri lui “invidiis buridis fûr di cuant che il jutori che al rive de Regjon al è calât”. Lis tensions, insome, si saressin rinfuarcidis cul andament economic gjenerâl.
Fin cuant che si podeve fâ sagre ducj cuancj, la convivence e jere avonde pacifiche. Ognidun tal so plet di ort, cence che si cjalàs chel dongje. Cumò che la Regjon e à alçade la grepie, ancje un pont percentuâl in plui tal ripart dai fonts al scomence a fâ gole. Par chest an, il totâl dai bêçs stanziâts al è di 900 mil euros, che lis sîs  associazion si dividin cun percentuâls diferentis: al Ente Friuli nel Mondo i rive il 32%.
Al va dite che il president Pittaro, fuart de storiute des parochiutis e de grepie plui alte in finanziarie, za di trê agns in ca al sta domandant ae Regjon une strategjie clare. Si visìn de sene, intant de “X Convention e incuintri anuâl dai furlans tal mont” tal cjistiel di Udin. Debora Serracchiani, governadore di cualchi mês, e rive a mieze zornade. E Pittaro i dîs: “O pensi che sîs ents dedicâts ai coregjonâi, e di chescj cuatri ai furlans tal mont, a sedin masse. No dîs di sierâju, ma o pensi che la nestre “first lady” e varà ce taiâ”. “In chê ocasion – al ricuarde vuê Pittaro – jal ai dite … Lis riformis coragjosis si fasin a inizi di legjislature. Ma la fantate no à volût scoltâmi”. Passâts i agns – tra cualchi mês la gnove Convention si fasarà a Cormons -, cul president in scjadince e che al vûl molâ, Pittaro al complete chê riflession: “Impensabilis dutis chês associazions, ancje parcè che la furlanetât tal mont e je un valôr “in bloc unic”, no pues jessi espression di partizions teritoriâls e salacor politichis. O sin un valôr incredibil, pecjât pierdilu o dividilu”.
Ma Debora no intervignarà. ❚
Oscar Puntel