In memorie di pre Antoni Beline. Si son cjapâts a bracecuel

In memorie di pre Antoni Beline, tal otâf aniversari de muart
A jerin ducj i doi in schene, sentâts in face de glesie di S. Martin di Rualp e Val, e no si jerin nacuarts che o jeri rivât. A cjacaravin sot vôs cul cûr viert. Mi soi fermât di daûr; o sintivi dut, cence jessi viodût.
Pre Antoni al diseve: “A son passâts ormai vot agns de mê muart. In vite, o ai gotât straceis di  lagrimis pal gno popul e glesie, ma mi somee che dut si è arsinît e che anzit un desert, la mancjance di sens di autonomie e di popul, si sta slargjant simpri di plui tune apatie gjenerâl. Cualchidun al dîs: Pôcs agns ancjemò e il furlan nol sarà plui un probleme”.
Ma chel altri i rispuindeve: “Tu âs reson sì e no. Dopo de tô muart al è cambiât clime. A àn fat  pape un argjentin che al à menade une svintade di aiar gnûf no dome te glesie, ma in Europe e tal mont. Lui al predicje un Diu che al vîf fra i tribulâts, fra i piês, Diu di  misericordie e no di svindic.
E cuant mai tai secui indaûr erial sucedût che une persone e podès cjacarâ cul pape in libertât, o a un omosessuâl di no sintîsi judicât, o a lis fameis di podê sintî -I cattolici non sono conigli-, o a un barbon di jessi ricevût te Capele sistine, o a certs cristians di butâur in muse: Facce da Quaresima… Dutis robis che tu tu vevis za scritis a mût to, ma che nissun sorestant o Pape al veve ancjemò proferît”.
E al continuà:
“A la fin di Otubar dal an passât e je stade fate in Vatican la sinode dai leaders dai moviments popolârs, soredut dai popui cence proprietât, ni cjase, ni lavôr. Il Pape ur à dit: “Nissun popul cence il so teritori! Ducj i popui a àn dirit a la sovranitât su la lôr tiere e su lis lôr risorsis naturâls”. E al zontave: “No critichis, no vuacâ dibant, ma frontâ cun dutis lis fuarcis chest caos che la economie mondiâl nus fâs gloti. Al è rivât il moment che i popui cence dirits si dein une organizazion”.
E al continuave disint:
“Al è ver che il Friûl al mûr, ma se o rivassis a dâ une soflade par parâ vie la cinise, sot de cinise a son cjaldis lis boris, e des boris al cjape flame un fugherut e daspò un fugheron. Coragjo! Tignît dûr! Salvait il vestri patrimoni di autonomie, di lenghe, di culture, parcè che cheste globalizazion salvadie no à sens. Sveaitsi, cjapait stime di vualtris!  No sês il popul plui disgraciât dal mont”.
Pre Antoni al dondolave il cjâf e nol saveve ce dî; però, si lu viodeve che al stave dant di ca e che la grinte i tornave.
Pre Antoni al disè:
“O ai  tant scrit cuintri une struture di glesie ridusude a istituzion, stacade de int, peade a la politiche a a soluzions di antigae. E lu fasevi in cussience, cul Vanzeli in man e pal afiet che i puarti a la mariglesie di Aquilee. Però vot agns indaûr, cuant che o ai lassât il mont, o jeri considerât  ancjemò un predi eretic, pelagjan, che i sorestants si vergognavin di me. E vuê no mi tocjarès miôr destin”.
Subit, chel altri i rispuindè: “Âstu let sui gjornâi i 15 pecjâts che il Pape ur à butât in muse ai gardenâi? La malattia narcisista, il cuore di pietra e la testa dura, l’alzheimer spirituale, la schizofrenia esistenziale”…
Al cjonçà pre Antoni: “Alore al è ben pôc ce che o ai contât te Fabriche dai predis,
un libri che al è improibît ore presint”.
Chel altri i rispuindè: “Tu tu âs dome ripuartât la veretât e no tu mertis condane; in chest câs a varessin di condanâ une vore di plui il Pape che al à palesât al mont intîr i pecjâts de curie romane”.
Pre Antoni al jere dut comovût. Il Signôr i veve fat gracie a vot agns de muart.
Tornât in sè al disè:
“E i nestris paîs cence predi, cu lis glesiis sieradis e la int a slas”…
Subit l’amì lu interompè: “No tu ti impensis plui di chês maris che tu âs cognossût, che no savevin il Credo ma che a disevin rosari dongje dal fi malât, o di chel om che al impiave une cjandele cul cûr sglonf, o di un frut inocent che al preave inzenoglât sot de crôs, e âstu za smenteât il Galandin e la Bibe, il Marcel da Dinquam e la Sulìn, Zuan dal Soldon di Treli e Marie da Bin, o chel om in preson che si scrivevis…  Trope fede, fra tantis tragjediis, no erie tal lôr cûr?
Cheste int ancje se no pree seont regule, no je cence Signôr, e à te anime il Spiritu Sant. I fedêi, unîts te glesie, no sbalgjin intal crodi; o vin di stimâ la pietât popolâr, la santitât semplice e gjenuine dai vanzums e dai escludûts. Lis comunitâts cristianis dal Gjapon, dal secul XVII in ca a son restadis cence missionaris par dusinte agns. Ma cuant che dopo a son tornâts di gnûf altris missionaris, a an cjatât dutis lis comunitâts ancjemò vivis. Ducj batiâts, ducj vude dutrine, ducj sposâts in glesie, e chei che a jerin muarts, ducj sapulîts cristianamentri. No  esistevin predis. E cui vevial fat dut chest? Personis semplicis: i batiâts.
Ce che de pastorâl dai paîs piçui e des glesiis cence predi tu tu scrivevis, al è dut vêr. Bastarès metilu in pratiche in pazience, preiere, ducj unîts e in tante umiltât. Il Spirtu Sant simpri nus maravee parcè che no si ferme al passât ma nus fâs cjaminâ viers esperiencis gnovis.
Coragjo, no tu âs pierdude ancjemò la batae; il to lavôr no ti è costât dibant. Disi al to popul che si svei. E ten a ments: no tu sês di bessôl”.
… Ma ormai a cisicavin pardabon sot vôs e o vevi il sun de peraule ma no rivavi a capî. O ai sintût dome pre Antoni che i diseve a pape Francesc: “Grazie”.
Dopo, a son jevâts in pîts e si son cjapâts a bracecuel. ❚
T.Z.