ZODIAC FURLAN. Roc

ROC
Nassûts jenfri dai 21 di Març e ai 20 di Avrîl
Segn di Tiere (naturalmentri)
Plante fortunade: la blave
–––
Il segn dal roc si clame cussì par uniformitât cun l’astrologjie mondiâl. Par vêr, cualchi studiôs furlan di astrologjie e à viodût che zontant lis stelis da la costelazion dal roc intun altri mût, a puedin vignî fûr ancje une damigjane di cinc litris, une fete di polente cuntune rondele di muset, un modon, une maiute dal Udin e secont cualchidun ancje la peraule “sghiribicilu” (imagjins che par altri e descrivin il caratar dal roc une vore miôr dal roc).
Seont la mitologjie, il roc al stâ li tal cîl parcè che dispès i rocs e vignivin sacrificâts ai dius. Puar Roc! Cumò, e je vere che ai furlans ur plâs fâ sacrificis, ma jessi sacrificâts no. Par chest motîf, ai rocs no ur garbin masse la cjar al sanc e i curtìs, e par vie di cheste carateristiche, no tu viodis mai tancj rocs che a cjolin cjase a Manià.
Seont di une altre liende, il roc al è chel cul pêl di aur che tancj erois a cirivin di cjatâ. Duncje, se o viodês un roc che i ten masse ai siei cjavei e al à pôre che i colin, nol è par vanitât (almancul, no se il roc al è furlan!), ma voie di sparagnâ.
Dut câs, il roc al è un animâl di mont, che si rimpine sù pai crets e no lu ferme nissun, e si compuarte cussì ancje in dutis chês altris robis da la vite. Al va a la concuiste dal puest plui alt ta la gjerarchie sul lavôr, dal teren cu la tiere plui biele par fâ sù cjase e metii dongje ancje un ort, dal miôr Montâs par fâ il frico, dal puest plui dongje dal bar cuant che va al stadi.
Rimpinantsi tant in alt, il roc al rive a viodi ancje miôr lis robis, a vê une visuâl plui largje. Ma chê carateristiche no vâl pal roc furlan, che, ancje lant plui in sù, il plui da lis voltis al cjate nûl.
Salût: se tu sufrissis di insonie, no stâ a contâ lis pioris par indurmidîti. Dal moment che tu sês un roc, e podaressin vê l’efiet contrari.
Un consei: Se ti rive une “cjadene di Sant Antoni”, zirile a ducj chei che tu puedis (o almancul a chei che e dîs la e-mail). Naturalmentri e je une monade e se no tu lu fasis nol sucêt nuie, ma se bielzà tu crodis a un oroscop, monade plui o monade mancul e cambie pôc. ❚