FRIÛL EUROPE. Lenghis, dirits, minorancis e tutele. Pal Stât Talian al è timp di esams

Al è timp di esams di Europe e in Europe. La Republiche taliane, in dutis lis sôs articolazions, no à dome di rindi cont a nivel continentâl di cemût che e spint e che e sparagne, e duncje di cetant e di cemût che a funzionin lis sôs politichis in cjamp economic. I tocje fâsi valutâ ancje in cont di un aspiet di fonde de democrazie, ven a dî la maniere che si compuarte cu lis minorancis che a son tal so teritori.
Cun di fat, tra il mês di Avrîl e chel di Mai, al rivarà a Rome e ancje inaltrò – par esempli: in Friûl e a Triest – il comitât di esperts che pal Comitât dai Ministris dal Consei de Europe al sta daûr de metude in vore de Convenzion cuadri pe protezion des minorancis nazionâls de bande dai Stâts che le àn ratificade. Chel talian lu à fat ancjemò tal 1997, cu la leç 302, e di in chê volte la sô condote in chest cjamp e je stade tignude sot voli di Strasburc.
A son stâts fats za trê monitoraments e cumò al è in vore il cuart. Su la fonde dai controi fats de bande dai siei esperts e de sô struture tecniche e istituzionâl, il Consei de Europe, pûr doprant il lengaç fin de diplomazie, in plui ocasions al à marcât a clâr diviers aspiets problematics, de mancjance di proviodiments di pueste par rom e sinti al nivel pardabon bas de metude in vore des leçs di tutele che a son e fintremai aes formis di intolerance che si palesin cuintri di diviersis comunitâts. Se si ten cont di cemût che a van lis robis, nol è dificil pensâ che ancje ae fin di chest gnûf monitorament a saltaran fûr mancjancis e problemis, salacor ancjemò di plui che in passât.
Chest fat al è saltât fûr intant de taule taronde ‘Friûl@Europe’ inmaneade ai 27 di Març a Udin inte suaze dal modul Jean Monnet MuMuCEI (Multilingualism, Multicultural Citizenship and European Integration) de Universitât dal Friûl. In chê stesse ocasion si à fevelât ancje di chê altre convenzion dal Consei de Europe in cont di lenghis e minorancis, la Cjarte europeane des lenghis regjonâls o minoritariis, che il Stât talian nol à inmò rivât a ratificâ, cundut che la sô adozion e je dal 1992, la sô jentrade in vore e je dal 1998 e Rome le à firmade tal 2000. L’argoment al è une vore di atualitât, stant che tes setemanis passadis in Senât a àn tornât a lavorâ parsore des propuestis di leç di ratifiche.
Simpri in ocasion dal incuintri fat alì dal ateneu furlan al è stât ricuardât che e covente une ratifiche «buine», cun nivei di tutele garantîts che a sedin almancul compagns di chei previodûts tes leçs statâls e regjonâl in vore. Cuissà se il student ‘Italie’, pardabon clopadiç tes provis pratichis e orâls, leadis ae Convenzion cuadri, al rivarà finalmentri a fâ almancul une prove scrite, cu la ratifiche de Cjarte, e a cjapâ la suficience?  ❚
✒ Marco Stolfo