EDITORIÂL – Se FVG al devente un dogme che nus puarte ducj al martueri

✽✽ A son chei che a pensin che la cuistion di Triest no sedi la prime e la plui impuartante pe bataie dal Friûl: “O vin – chest il lôr pinsîr – di puartâ indenant i nestris problemis cence pierdisi daûr di lôr, rinfuarçâ lis nestris lidrîs, cirî di contâ su lis nestris fuarcis. Fâ simpri polemiche nol covente a nuie”. Si podarès jessi dacuardi se no fos SIMPRI alc che invezit al puarte a pensâ in maniere contrarie.
✽✽ Il mês passât Diego Marchesoni, president dal cors di ostetricie de universitât dal Friûl al à dite che al voleve dimetisi cuintri de lauree uniche cun Triest. Il prin cors di ostetricie al è nassût in Friûl tal 1930, la nestre facoltât di medisine e ven fûr di li. Une glorie furlane, ricognossude in dute Italie pe sô professionalitât e braùre.
✽✽ Parcè il professôr isal contrari? “A Triest il cors lu tegnin infermieris e cheste decision mi somee jessi dute politiche par favorî la viertidure de scuele par tecnics de riabilitazion psichiatriche a Triest”. Cun lui ancje i coleçs des ostetrichis di Udin e Pordenon: “A paiaran – a disin – lis maris e i frutins”. Duncje par fâ un plasê a Triest, al paie il Friûl. Pardabon se chest progjet al fos dentri di une strategjie par fâ lâ miôr lis robis, si podarès ancje discuti, ma se i professioniscj dal setôr a son sigûrs che e larà piês, parcè?
✽✽ Un brut suspiet mi rive ancje su le cuistion des Cooperativis: pe buse des Coop Operariis di Triest al somee che si rivarà a cjatâ une soluzion, no dome par no pierdi puescj di vore, ma ancje par tornâ indaûr i bêçs ai socis. Pe Coopca ogni dì che al passe e je simpri piês.
No volarès che denant de sielte di salvâ dome une des dôs realtâts, il sisteme Coop talian al risolvès la cuistion in maniere “politiche”, dulà che Triest al conte plui di dute la Cjargne. Doi esemplis, e no stin a fevelâ di ce che al è petât fûr su la cuistion de Fieste dal 3 di Avrîl!
Insumis: se ancje si volès fâ finte di nuie, lâ indenant pe nestre strade, resonâ intune vision “unitarie” di cheste Regjon, al è simpri alc di bande triestine che nus puarte indaûr. E, o torni a ripetilu, se al fos un alc di bon par ducj, si podarès resonâ, ma al è simpri dome a pro dal so interès. Pensâ duncje al svilup dal Friûl al vûl dî fâ i conts cu la “contradizion Triest”. Cumò simpri di plui, viodût che lis palanchis a son finidis e si cîr di centralizâ dutis lis risorsis.
✽✽ Il dibatit sul doman de specialitât regjonâl al à di tignî cont di cheste cuistion: nus coventie ancjemò une autonomie cun cheste muse? Parcè lâ in vuere par jessi dut câs sotans?
Par tornà a fevelâ di “coesistence pacifiche”, di unitât cuintri de normalizazion de Regjon, si scuen ricognossi che il Friûl e Triest son dôs realtâts diviersis.
✽✽ Puedino stâ dongje? Dome se si varà il coraç politic di ametilu cence che Fvg al deventi chel dogme che nus puarte ducj al martueri. ❚
Dree Valcic