VIERS IL FRIÛL. Sapade e Cint no stan a cjalâ

No dome su pe Patrie ma ancje in Consei regjonâl si è tornâts a sburtâ par acelerâ il passaç di Sapade-Plodn e Cint dal Venit al Friûl. Ae fin dal mês di Fevrâr, in V Comission a Triest, a son stâts sintûts in audizion i sindics dai doi comuns, Manuel Piller Hofer e Gianluca Falcomer, che cui rispetîfs “vice” a àn vude la pussibilitât di contâ lis ultimis sul iter legjislatîf (la leç De Monte-Bellot) impantanât a Rome. Come che o scrivevin il mês passât, il probleme plui grues cumò par Sapade-Plodn al inten la relazion tecniche che il Guvier al à di preparâ cu la verifiche de Resonarie gjenerâl dal Stât, par controlâ che cul cambi di Regjon no sedin conseguencis negativis su pe butade fiscâl che e rive a Rome. Un comun turistic tant che chel dal Cjadovri, di fat, al incasse jentradis no di pôc cont tra Ivz (Iva) e Ires. “Sperìn che a decidin subit – al à spiegât Piller Hofer – parcè che noaltris o volaressin vê clâr il cuadri: in bal a son ancje lis riformis dai ents locâi e o vin di organizâsi par timp”.
Par Cint, invezit, si spiete la aprovazion de propueste di leç depositade ae fin di Avrîl dal an passât, a firme dai deputâts Giorgio Zanin di Sant Vît al Tiliment e Sara Moretto di Puart, rapresentants un di une Regjon e une di chê altre. “Un fat chest che – secont il president dal Consei regjonâl Franco Iacop – al fâs ben sperâ par rivâ insom; ancje se – al à zontât – vuê la situazion e je plui complicade di un pâr di agns fa, cuant che i doi comuns a vevin votât il referendum”. Il riferiment al è lât al futûr des regjons, metudis in discussion a nivel nazionâl, al concet di specialitât, cussì come al progjet di une provincie venite de mont. Altre cuistion saltade fûr in ocasion dal confront tra i doi sindics e i conseîrs regjonâi, e je stade chê de cooperazion transregjonâl, in riferiment ai moments di scugne dulà che si à di discuti di rognis o progjets di confin tra Venit e Friûl: traspuarts e mobilitât; svilup economic dal teritori; sanitât e tutele dal ambient. Se tra Venit e Trentin al esist un sisteme automatic di confront, tra Venit e Friûl chest al mancje. ❚
David Zanirato