A TU PAR TU. Il Vanzeli seont Pre Checo. Ce che a disaressin dal Friûl di vuê, chei che a àn fat la sô storie

Montenârs, piçul borc langobart jenfri lis monts parsore Glemone e Dartigne. Bisugnarès rimpinâsi fin ca sù in Otubar, te ete des cjastinis, par gjoldi colôrs, profums di bosc, sunsûrs. Ma cuant che la fuee e cole, di chê altece tu puedis cjalâ in muse – come no mai – il Friûl di une bande, e di chê altre i trois che a menin in Sclavanie, antîcs tant che la Storie de nestre Int. Lu cjati dentri tal so rocul, a bruscjâ lens. Bregonats a cuestis di vilût e une cjamese che e scjampe fûr des tiracjis. “Tegnimi sot la scjale fintremai che o çoncji chê ramace, fantat.” Mi ven di ridi. “Graciis pal fantat, monsignôr!”. “Lassimi il Signôr a mi, e tu tegniti il mone par te”. A viodilu cussì, dal bas in alt, pre Checo mi somee un predicjadôr protestant rimpinât sul pulpit di piere, intorteât sul tor de sô Glesie. In chest câs, une glesie arboree, vivente, cu la fuarce de Tiere a pompâi dentri une linfe che e sa di lavôr, di sudôr, di bon. Stesse ande e stesse vôs. Tignint cont che bielzà dal 1978 lui al publicave un intervent fondamentâl e, magari cussì no, profetic dal titul “Friuli un popolo in pericolo”, mi ven la gole di fâi une domande propit sul popul furlan, cemût che lu viôt lui, in dì di vuê, a cuasi trente agns dal so congjedâsi di cheste vite. “Indurmidît. Poiât. Confondût. Masse saceât. Incjocât di pan. Mi pâr un mieç disastri, sedi inte societât, che intal cjamp de culture. No stin a fevelâ po di politiche o di glesie, che se no pe rabie tu mi fasis blestemâ”. O cîr di tignî salde la scjale, che cuant che si infurie l’om al devente dut ros, si agjite, al mole la prese par sbraçâsi come se al ves di cjapâ un agnul che al passe di li pes plumis e sdrondenâlu prime di lassâlu scjampâ. “Apont. La Glesie…” Ma no mi lasse nancje finî di fevelâ: “O ai simpri scombatût par une Glesie che e sedi pastorâl. Buine di pensâle cul so cjâf, libare finalmentri di ogni sotanance al podê. Une Glesie che e fos braurose dai siei piçui plui che dai grandonons di chei altris. Braurose de sô storie, impastade cu la fadie e la pietât di chei che no vevin nuie, nancje la vôs, ma che le cjatavin propit tai siei rituâi antîcs, te maravee de bielece di une storie, chê dal Patriarcjât di Acuilee, seconde a di nissun. No plui impuartante, ma nancje mancul interessante di chê di chei altris popui”.  Lu viôt dismontâ, scjalin par scjalin, fin cuant che si plante di front di me. Mi cjale tai voi, mi sgarfe dentri. Al à i ocjâi apanâts, al è sgjavelât e la sô muse in bore. Jo o olsi dome a domandâi, cuasi sot vôs: “Ma ce isal sucedût?”. E vie lui, che cence nancje cjalâmi al tire dret pal troi, continuant la sô predicje, cuntune vosate impastade di grocje e di marum: “Ma ce pretindistu di un clericât di palaç o di sagristie, une burocrazie di predis che e gjolt dome di no impaçâsi? Sodisfate se e rive a tirà sù cualchi carantan par un funerâl, par un batisim, par un invît a gnocis? Sù mo frut, no stâ a stiçâ i tabars che a ‘nd ai une fote… Chei pôcs che ancjemò a crodin e a scombatin a son simpri di mancul. Isolâts, emargjinâts, no scoltâts. Ju cognòs ben, un par un. O pues dî che ju ai cressûts jo. Jo, il trist mestri, come che la jerarchie mi à simpri clamât. Ma come un pari o soi braurôs, disint che lôr – chei pôcs di lôr – a fasin un bon lavôr”.
O fâs fature a stâi daûr, che pre Checo al à la ande di un des monts. “Ma di chê fabriche dai predis, come che al diseve pre Toni, ce vegnial mai fûr cumò? Ce gjenerazion di impleâts ben rifinîts e educâts stino fabricant? Predis o funzionaris? Fantat, o crôt che la Glesie in Friûl e vedi fat un pas indaûr di almancul une trentine di agns.” Orpo. O pensi che cheste e sedi propite dure di gloti, par cualchidun. Ma se Placeran al è stât scomut di vîf, figurìnsi se si conten cumò, che nissun i pues  scrivi une letare di censure.
Si ferme propit su la cueste. La plane di Osôf, la Mont di Muris, il Tiliment sot dai nestris pîts. “Cjale chi, chê tiere sflandorose. Siore di secui di intersezions, di miscliçaments, di lenghis, identitâts, dius e preieris. Aquilee no divideve, ma e impastave dut intune malte benedete. Un Patriarcjât di muredôrs furlans! Par chest, ae fin le àn brincade e sdrumade. Visiti ben: 1751. Un delit. Podìno permetisi di butâ vie tant aur par un boçut di asêt?”. Lu cjali ben, e dome cumò che il nestri timp al sta rivant ae fin, mi ven une bote di nostalgjie. “Âstu par câs un toscan?”, mi domande a colp, prime di slontanâsi viers l’intric dal bosc. “Là che o soi jo cumò a son fissâts cu la salût. Sant Pieri al è un grant igjienist. Par fortune che ogni tant cualchi Sant di Alessandrie, par vie de tradizion dal descensus ad Infera, al torne sù cul tabac bon. Di fat, di chê altre bande a son simpri stâts un freghenin plui tolerants”. ❚
Angelo Floramo