Glemone no si plee

Manifestazions, strissons, lanternis, presidis. Lis stan provant dutis i glemonàs par difindi il lôr ospedâl. Une bataie continue che e sta lant indenant di plui di un an, dopo che la Zonte Serracchiani e la assessore Telesca a àn scrit e fat aprovâ la leç di riforme dal sisteme sanitari regjonâl, dulà che il “S. Michêl” al ven riconvertît. Se la aministrazion comunâl dal sindic Paolo Urbani e à tentadis dutis lis stradis istituzionâls pussibilis par fâ cambiâ idee a Triest, la popolazion no à volût stâ cu lis mans in man e plan plan al storic Comitât “La Cicogna”, nassût dai agns novante in ocasion dai prins tentatîfs di depotenziâ l’ospedâl, si son zontâts altris grups, dal Comitât S. Michêl al grup Facebook “Io voglio l’Ospedale a Gemona del Friuli” e po dopo la associazion dai comerciants locâi “Conserva”. Centenârs di citadins che si son pocâts fint sot e dentri dal Consei regjonâl par dî la lôr, par spiegâ che nol è concepibil a nord di Udin tegnî vierts dome doi ospedâi (chel di Tumieç e chel di S. Denêl), che nol è just sacrificâ dut un teritori par logjichis politichis, che nol è soredut ecui ridimensionâ une struture che cui numars di acès anuâi e je ben plui doprade di chê par esempli di Spilimberc che invezit si è lassât cussì cemût che al è, ancje se a dome siet chilometris di distance al funzione l’ospedâl di S. Denêl”. Lis resons dai glemonàs a van cirudis ancje tal fat che il lôr ospedâl al è tra chei pôcs costruît fûr par fûr cun normis antisismichis, propit par chest fat i comitâts a àn za fat savê che a son pronts a interessâ cui che al à di proviodi.
La Regjon no somee che e vueli molâ il pont e par chest e continue a rispuindi che nol cambiarà nuie de sigurece des curis dai citadins, il “S. Michêl” al sarà riconvertît in “presidi ospedalîr di salût”, al vignarà potenziât tes riabilitazions dai luncdegjents, te medisine pal sport e tai ambulatoris specialistics (cardiologjie, oncologjie, gjinecologjie, diabetologjie, oculistiche, e vie indevant). Sul discors des emergjencis il pront socors al deventarà “pont di prin intervent” e e je stade butade fûr la promesse che si cirarà di meti a disposizion une ambulance par ogni valade, in maniere di intervignî in maniere pronte cuant che magari l’elisocors nol rive. Di pôc timp ancje il gnûf diretôr gjenerâl de aziende sanitarie numar 3 “Friûl de Alte – Culinâr – Friûl di Mieç”, Pier Paolo Benetollo, al à garantît che nissun nol à di preocupâsi parcè che l’Ospedâl di Glemone nol sarà di Serie B.
Promessis che no vegnin crodudis dai Comitâts, che a continuin tra l’altri a denunciâ un costant e lent impuariment de struture, menaçant gnovis iniziativis, simpri plui clamorosis. ❚
David Zanirato