50 AGNS DE REGJON. Il dibatit politic

Il confront politic tor de cuistion “Regjon Friûl-Vignesie Julie” al fo alc e ce. Tal dibatiment ae Costituente il probleme teritoriâl al fo discutût a lunc. Tito Maniacco, te “Storie dal Friûl in curt”: «Tignint cont de cuistion di Triest, une cuistion di principi, si rivà a un compromès, che nol rivà a contentâ nissun. No fo cjapade in considerazion la viere cuistion di une autonomie furlane, che e fos leade aes sôs carateristichis storichis. E jere pôc cognossude, tant che vuê e je pôc cognossude la storie dal Friûl; l’autonomisim catolic, tradizionalmentri anti unitari e anti  risorzimentâl, al jere viodût cun suspiet de çampe».
Chei che si oponevin ae specialitât, dut câs, no rivavin a mandâ par aiar la decision finâl de Costituente. Ciert, però, a otignirin ae fin la aprovazion de decime disposizion transitorie de Cjarte, che e rimandave a timp indeterminât la costituzion de gnove regjon. Duncje, il cuadri politic che al jessè al viodè contraris socialiscj e liberâi; i comuniscj a vevin iniments adiriture un referendum. Democristians e republicans no mostrarin gran entusiasim. Anzit: dentri de DC lis corints si scuintrarin in ziraments di aiar memorabii. Tal Otubar dal ’47, la decime disposizion transitorie e fo proponude propit di oms de DC: Gronchi, Piccioni, Piemonte, Facchinetti, Macrelli, Vigna e Scoccimarro. E ai prins di Fevrâr dal 1953, plui di 5 agns dopo de jentrade in vore de Cjarte, a non dai parlamentârs furlan, Tiziano Tessitori al conte al President dal Consei Alcide De Gasperi dute la comedie. La letare si cjate tal Archivi di Sedean. Tessitori al scrîf: “(Gronchi) al veve osservât che motîfs di ordin politic a conseavin di rimandâ ogni decision definitive, lassant la risoluzion definitive al futûr Parlament, soredut pai resints avigniments internazionâi che a fasevin di cheste Regjon un pont particolarmentri dedicât e sensibil, pe politiche interne e foreste. O varessin argoments suficients par mostrâ il nestri disacuardi cuntune motivazion simile. (Cheste) e fo il risultât di un compromès tra cui che al voleve (Parri, Codignola e Binni) la revoche de autonomie speciâl concedude e cui che (Zuccarini e altris) al insisteve che e fos metude in vore. Pal vêr, plui che resons internazionâls, a influirin lis protestis di cierts anti regjonaliscj locâi”. Cuant che, tornât a jessi elet al Senât, Tessitori al frontà di gnûf la cuistion dal Statût speciâl de Regjon Friûl, ai 25 di Jugn dal 1962, ae Cjamare Alte, al puartà cuatri emendaments: istituzion de provincie di Pordenon, Udin cjâf lûc aministratîf par cuistions gjeopolitichis, Triest citât speciâl, dentri de specialitât de Regjon, cun largje potestât di autoguvier. La Dc lu metè al pâl, ma ai 24 di Lui il Statût Speciâl al ve il bon acet, cemût che al burive fûr dai progjets di Biasutti, Armani, Schiratti, Toros, Pellizzo e Tessitori. Cussì il senatôr al sierà il so discors in Senât intant dal dibatiment: «Il Stât al scugnarès fâ un secont pas e studiâ la pussibilitât di tornâ a dâi a Triest, in cualchi mût, la sô “suaze teritoriâl”, che nol je il Friûl, che nol pues jessi il Friûl, che no fo mai il Friûl. La sô “suaze teritoriâl” e je la Europe dal centri-est (tal so intervent par talian il senatôr al dopre la peraule ‘retroterra’, ndr)».
La atuazion de decime disposizion transitorie e procurà un ritart te istituzion de Regjon Friûl. Si rivà ai 31 di Zenâr dal 1963, cu la leç istituzionâl e cul relatîf Statût. E l’Ent al fo metût in funzion, di fat, tal Mai dal 1964.❚
O.P.