AL CINE CUN BETE. Il cidinôr dai inocents

Un grant misteri al savolte il Friûl: un sassin seriâl che al cope zovinis. Par discuvierzi il colpevul e fermâlu, la polizie no baste: al ven clamât l’FBI (Furlans cu la Barete Investigazions). Secont l’FBI (Furlans tal Bar Investigazions), il criminâl al è leât in cualchi maniere al famôs sassin seriâl Bepon il Mangjon, clamât cussì par vie che si mangjave lis sôs vitimis (di fat, al jere cognossût in dut il mont tant che Hannibal the cannibal).
Par fevelâ cun Bepon e gjavâi fûr cualchi segret, l’FBI (Furlans & Babis Investigazions) al mande Catine Sterling, une zovine che e à a pene scomençât a lavorâ.
Catine e jentre te preson di massime sigurece dulà che a tegnin Bepon il Mangjon e e scomence a cjapâ confidence cun lui. Bepon il Mangjon al è un om une vore pericolôs, ma ancje une vore inteligjent; di fat, al è un psichiatri cuntune sensibilitât fûr dal ordenari: al rive, dome cjalant in muse une persone tal bar, a capî se e sta par ordenâ un blanc o un neri.
A planc a planc, Catine e Bepon si cognossin un cun chel altri. Si discuvierç, par esempli, che Bepon al è deventât sassin seriâl stant che al è cressût intune famee di vegans e astemis. Cussì, l’unic plat furlan che al podeve mangjâ al jere il risot cul sclopit, ma mantecât cul vueli e no cu la spongje! E cence un got di vin dongje.
Ma ancje Catine e à vût un traume di piçule, par jessi stade a cjalâ la macelazion di un purcit: ancje se so pari i veve insegnât che dal purcit no si bute vie nuie, chê dì, Catine e à viodût il contadin a butâ un muset intîr tes scovacis! Catine sal insumiave ancjemò di gnot, chel muset straçât.
Bepon al scolte Catine cuant che i conte des investigazions, Catine e puarte di mangjâ a Bepon robis che nol veve mai provât: luianie, cjarsons cu la scuete, broade e muset.
Cussì, ae fin, Catine e rive a un acuardi cun Bepon: l’FBI (Furlans Bacucs Investigazions) i concêt une cele plui largje (e mancul sigure), e lui ju judarà a cjapâ il sassin seriâl.
Cul plan di Bepon, l’FBI (Furlans Braurôs Investigazions) al rive a cjapâlu: di fat, il serial killer al jere triestin e l’FBI (Furlans a Barcola Investigazions) lu tire intune vuate cuntun volantin par fâ une lampade a gratis.
Bepon, però, al rive a scjampâ de gnove cele e, tal finâl, al clame Catine al celulâr: “Mandi Catine, usgnot o ai un amì a cene!”
“No!”, e dîs Catine, “Cui ti mangjistu cheste volte?”
“Sêstu mate?”, al rispuint Bepon, “Cumò che tu mi âs fat cognossi la cusine furlane, dome polente, frico e Tocai!*”
* Il film al è rivât prime dai ongjarês, duncje che a stedin cidins! ❚
Bete di Spere