SIMPRI BOGNS. “Luigi Candoni, Strissant vie pe gnot”, Udin, 1975

“No sai. Par mil e mil agns l’om al larà indenant, strissant vie pe gnot, a cirî il parcè dal parcè. O ai pôre di ce che al ven a nassi (…). Jo o resti ce che o soi, cul mâl che mi soi cjatât dentri, cuant che o soi nassût. Il gno mâl al è la uniche robe che mi reste e che mi fâs ce che o soi. Cence il gno pinsîr malât jo no sarès Caino. E cence Caino il mont al è un sac di nuie”.
La storie di Cain le cognossìn ducj e alore cheste citazion nus fasarà subit pensâ a une riflession mareose dal prin dai doi fîs di Adam e di Eve su ce che al à fat, sul so delit, il prin delit de Storie. Ma in chest drame di Luîs Candoni lis robis no son propit cussì. Cain al à, sì, un pari, Adam, e une mari, Eve, e al à ancje un fradi, Abêl. Ma lui al è il fradi plui piçul e al è timidut, scjars, debil: nol à cûr di copâ nancje un jeur, ni une gjaline, ni une surisute. Abêl, invezit, al è grant, fuart, prepotent, violent. Darest dute la famee e je scuinternade: a vivin intun puestat, une sorte di discjarie, e a son sporcs, bruts, ignorants, fals, cragnôs. No san nuie dal mont, no san se al è alc altri in plui di lôr, no san ce che al jere prime di lôr e no san se al sarà alc daspò di lôr, no san se la lôr cjase (se si pues clamâ cjase chel cjôt) e je la prime o la ultime de citât e no san nancje se e je une citât. E jenfri di lôr si odein e si insolentin: cjastronat, striate, cidule fraide. Cuant che Adam e Eve a sintin che Cain al à vude une profezie chei dîs che al sarà lui a copâ so fradi, invezit di sgrisulâsi, i dan seont a doprâ daurman il curtìs e jal metin in man.
Po al sucêt alc che nissun sal spietave. In chê sorte di ledanâr al rive un personaç tant diferent di lôr che ju lasse scaturîts e cence peraulis: il blanc, dut net e ben vistût e che al fevele inglês e che i insegne a fevelâ fintremai ae çuete (altri personaç di abiezion) che prime e jere dome in stât di rugnâ.
Candoni al presente une leture dute personâl e origjinâl di chest mît che i da forme aes domandis che l’om si fâs di cuant che al è om: parcè il mâl, parcè la muart. Ae fin dal drame, Adam che, pe prime volte al à viodût un muart, si domande simpri plui spaurît: ’Parcè murî?’. E Cain al repliche: ‘Parcè nassi?’.
Su la vicende di Cain a àn vût scrit tancj grancj autôrs: Byron, Hugo, Belli, Saramago. Cheste vore di Candoni e je in dut meritevule di stâ a pâr cun chescj grancj de leterature mondiâl. ❚
✒ Laurin Zuan Nardin