Par no restâ impaltanâts tes bonifichis de lagune

Vincjesîs indagâts, un “dam” di almancul un centenâr di milions. In sintesi estreme, a son chescj i numars che a cjapin dentri lis acusis pes “bonifichis legris” inte Lagune di Grau e di Maran. Bonifichis, daûr de acuse, in grande part injustificadis e “inventadis” a pueste par sglonfâ i conts di un sisteme che di fat al coventave dome par drenâ bêçs publics, di Stât e Regjon. La tutele dal ambient e de salût publiche tant che rimpin par afârs tant plui privâts. Cemût che a laran a finî lis robis, o starìn a viodi.
Ma la inchieste e ufrìs la ocasion par resonâ suntun “modus operandi” che no dome nol ven dislidrisât, ma anzit – viôt i câs dal Expo 2015 – al ponte a consolidâsi, complice une burocrazie che al è pôc clamâle borboniche, e zonis grisis, in plui di episodis dibatûts che – cemût che al è sucedût inte Basse intai agns passâts – a àn fat cressi la difidence viers gnovis prospetivis di invistiment e di disvilup, su la onde, tant par citâ, di chei câs Canone e Fingel che a àn tignût bot a dilunc su lis cronichis.
E cussì, intal dubi, miôr la paralisi. Intal periodi de gjestion comissariâl de Lagune, inte aree de Ausse Cuar diviersis aziendis a àn rinunziât a progjets di espansion par vie dai coscj proibitîfs dai carotaments imponûts dal plan di caraterizazion che vuê al podarès risultâ – ae lûs des investigazions – esagjerât o adiriture dal dut inutil. Gnûfs insediaments a son risultâts impussibii ancje par vie di chês indicazions sul tas di intosseament de aree che – cemût che al jere stât sotlineât di cualchi esponent dai Industriâi in chê volte – a rindevin impussibile ancje dome la imatricolazion di une gnove auto a benzine o diesel in dute la aree cence intopâsi intal pericul di passâ i parametris. E ce dî dal recupar dai pantans? Prescrizions su prescrizions che ae fin a ridusevin a un tierç la capacitât des vascjis di jemplade, par esempli. E timps biblics, cun comitâts tecnics sientifics che si devin adun a ritmis lungjons, che di chei si si son lamentât plui voltis i stes vertiçs de Ziac. Ma dut al è lât indevant compagn.
Epûr, intant, si è lâts indevant a ripeti e a ribati a ducj i nivei – cjapâts dentri chel politic e imprenditoriâl – la impuartance e la strategjicitât de Ausse Cuar e di chê part de Basse Furlane: lis potenzialitâts, mai disfrutadis al miôr, di Puart di Noiâr, tant che stazion par fâ rivâ materiis primis o imbarcjâ manufats di espuartâ des aziendis furlanis; il colegament cu la rêt autostradâl o la vicinance cun Çarvignan e la sô linie feroviarie (e chel Interpuart ogjet di polemichis e plans di rilanç ripetûts). Ducj elements che a varessin podût atirâ invistiments, ancje forescj, e progjets di insediament e di disvilup, cumò ridots cuasi a operazions “spot” (e no dutis cun risultât feliç). Il stes Consorzi Ziac al è finît tal mieç di polemichis pe sô gjestion (e no dome par cualchi assunzion contestade) e cualchi indebitament di masse, che cualchidun al à stimât come minim no oportun.
Se chest al è il cuadri de situazion, ae lûs dai episodis dal passât e des investigazions di cumò al è il pericul di une altre pierdite di credibilitât e di ciertecis. E, di consecuence, di fiducie, ingredient indispensabil par atrai i invistiments, par esempli. Soredut chei forescj o di altris zonis di Italie. I varis report internazionâi a van indenant intrepits a relegâ, dâts ae man, il nestri Paîs intes retroviis pe pussibilitât di “fâ imprese” (viodêt il resint “Doing business 2015”, che nus mande indaûr dal 52 al 56 puest mondiâl). Burocrazie, coruzion, zonis grisis… Almancul in chel – cumò che ancje a nivel politic centrâl al somee che e prevali la tentazion di ripuartâ dutis lis regjons ae «ordenarietât» – al sarès oportun che il Friûl si dimostràs “speciâl”, fasint un pocje di clarece e un pocje di pulizie. ❚
Linux