The Rolling Clap. In viaç te vie Romee Cjargnele

The Rolling Claps (ven a stâi, in maniere leterâl, “claps che a rodolin”) al è un grup di personis che ur plâs cjaminâ e che di cinc agns incà (de fin di Avrîl ai prins di Mai) a van a Vignesie a pît. Ogni an a sielzin un percors diferent: in realtât e je une riscuvierte dai percors principâi che par vecjo a jerin une vore cognossûts e traficâts tal nestri teritori furlan. Cheste Primevere a son partîts di Tarvis e a son rivâts in nûf dîs a Vignesie (270 km). Il prossim an, a laran a partî fûr dai confins de regjon o ben in Emilie Romagne par lâ a cognossi la vie Romee.
Di cheste clape a fasin part furlans, triestins ma ancje int di fûr regjon; si trate di inzegnîrs, insegnants, gjornaliscj, agricultôrs, fotografs che ogni an si cjapin il timp par fâ cheste lungje cjaminade. Tal sît www.rollingclaps.org, indulà che si podin seguî in timp reâl lis lôr impresis, si lei che “o lin parcè che nus plâs vagabondâ sudâts e plens di polvar pes campagnis e dopo fermâsi a bevi une bire… scoltâ la storie di cualchi vecjo… e je une maniere par viodi miôr lis tieris indulà che o vivìn, capî cemût che a stan cambiant, in ce maniere che a resistin i piçui paisuts… scoltâ lis lenghis e i dialets… incuintrâsi cu la int, saludâ cui che o cjatìn pe strade… o lin parcè che prime di nô, tai secui, tancj a son lâts a Vignesie a pît. A lavin spes par dopo imbarcjâsi e lâ a Jerusalem, o a son passâts par dopo lâ a Rome, o a Santiago de Compostela.”
I Rolling Claps si cjatin ancje di Atom par fâ une cjaminade curte che e dure pôcs dîs; propit tal ultin fin di setemane di Otubar a àn pensât di fâ a pît la vie Romee cjargnele, partint di Tamau e rivant a Vençon: il percors al cjape dentri part dal Troi des Plêfs e la vie dal Tiliment viers Vençon e Sant Tomâs di Maian.
Partîts di Tamau, passant par Cleulis, a son rivâts a Çurçuvint, finint la prime tape di 8 km tal Bosc di Musers. La dì dopo, vie viers Sudri, Priole e Noiaris, sù te Malghe Daude, Fielis, Sant Pieri, Sece e Fusee, indulà che la sere a àn screât l’Albierc difondût (tape di 22 km). Domenie a àn lassade Fusee, a son passâts a Tumieç, a àn passât il puint di Avons e, vie pe piste ciclabil, a son lâts a Cjavaç, Pluver e Vençon, sierant la tape di 24 km ae fieste VenzonEvo.
“Dificoltâts no ’nt cjatìn mai – al conte il pelegrin Luigi Nacci – parcè che si adatìn. Il bon stâ si cjate simpri. Il Friûl al è une zone che e da bon acet. Passâ in Cjargne al vûl dî passâ intune tiere di personis sieradis e il biel al è che al baste pôc e si vierzin. Il fat di passâ a pît al somee che al fasi impensâ aes personis chel che o jerin une volte: pastôrs, agricultôrs, dute int che e viveve te strade, tal mieç de nature e che no veve pôre dal forest – al siere Luigi. – Tancj di nô o sin lâts al Cjamin di Santiago ma parcè lâ cussì lontan cuant che o podìn fâlu ancje ca di nô?”
E je propit vere che tantis voltis si va a cirî la Americhe cence rindisi cont che le vin sot i voi ogni dì! ❚
✒ M.V.