Tal cjâf de Serracchiani dome tante confusion

La Serracchiani tal incuintri di Triest cu la Camusso de Cgil e je stade une vore clare: par je la specialitât e je “prime di dut, gjestî ben trê robis che a vegnin riconossudis ae Regjon: sanitât, ents locâi e traspuart public e doprâ miôr i bêçs de Unione europeane».
O savìn ben che la siore e je ancje vicesegretarie taliane dal Pd e che duncje un tic di confusion tal cjaf e je di capî, ma e à di sclarînus cuale che e je la diference tra une Regjon speciâl e une ordenarie.
O volarès viodi cui che nol è dacuardi tal cirî di lavorâ miôr pussibil in chei setôrs o no straçâ i finanziaments de UE. Un aministradôr public che al sedi piemontês o calabrês al fevelerà inte stesse maniere. Ce varessie di contâ? Che e sta lavorant par copâ i malats, fermâ i trens e sdrumâ i municipis?
Le presidente e fâs finte di nuie e, cjacarant cussì, e fâs il zûc di chei che a vuelin scancelâ lis Regjons autonomis. Se di fat la specialitât e je dome une cuestion di buine aministrazion, parcè chês altris Regjons no puedino jessi sul stes nivel?
La cuistion, che la Serrachiani si cjale ben dal tocjâ, e je: parcè gjestìno noaltris sanitât, traspuarts e organizazion teritoriâl?
Parcè che il legisladôr, cun tant ritart, al veve viodût la presince di une e plui minorancis suntun teritori cun musis diviersis di chês talianis. Aes lôr storie e tradizion, ae lôr culture ur ricognosseve la fuarce e la pussibilitât di une organizazion sociâl e aministrative in part diferente di chê statâl. Punt.
Plui in là di chest, la Italie, centraliste di simpri, no voleve là. La autodeterminazion dai popui e je une peraule disconossude tal vocabolari roman, lu savìn.
Ma che ancje chel nuie che nus àn dât al vegni metût in discussion, mi somee propit une barzalete.
Chê de Serracchiani e je tant che chês di Berlusconi: e fâs ridi dome i tirepîts. ❚
✒ L’om di Buri