FRIÛL EUROPE. Timp di Europe, di lenghis e di mobilitazions

Il valôr dal pluralisim linguistic, il dirit di cognossi e doprâ plui lenghis e lis pussibilitâts di disvilup culturâl, democratic, sociâl e economic che a divegnin propit de cognossince e dal ûs des lenghis. Chê dai 26 di Setembar e je une zornade impuartantone pe Europe e pai siei citadins. Di passe dîs agns e je la Zornade europeane des lenghis e ogni an e je ocasion di iniziativis di promozion de diversitât linguistiche, de educazion plurilengâl e dal dirit ae lenghe e aes lenghis. Ancje chest an chê che e je une des ricorincis che a sclarissin miôr lis fondis de Europe «unide te diversitât» e vignarà memoreade cun tantis manifestazions ator par dut il continent.
Tal mês di Setembar a son ancje altris inovâi impuartants che a tocjin diversitât linguistiche e dirits. Une date clâf e je chê dai 11 di Setembar. In chê dì, un an indaûr, il Parlament european al faseve buine une gnove risoluzion pe garanzie dai dirits linguistics e pe promozion des lenghis minoritariis. Cun chel test, i eurodeputâts a marcavin la impuartance politiche, culturâl e socioeconomiche de diversitât linguistiche e de tutele des minorancis pe Europe e a sburtavin sei chei altris orghins de UE che i guviers dai Stâts a fâ cuintri aes pratichis di discriminazion linguistiche e di assimilazion e a meti in vore azions strategjichis che a tocjin istruzion, media, vite publiche e politichis culturâls. Tal 2012, simpri ai 11 di Setembar, chel stes Parlament european al veve fat buine une altre risoluzion dedicate ae istruzion e ae formazion là che si domandave ai vertiçs europeans e ai guviers statâi di investî di plui in chescj setôrs, cuntune atenzion specifiche pes competencis linguistichis e pes lenghis minoritariis, marcant che azions di cheste fate no son dome justis ma a deventin di grande convenience pal disvilup sociâl e economic.
Chê dai 11 di Setembar e je une date particolâr soredut in Catalogne, stant che e je la “Diada”, la fieste nazionâl. L’inovâl de sconfite di Barcelone dal 1714 al à cjapât sù significâts ancjemò plui impuartants tai ultins agns, inte suaze de gnove domande di autodeterminazion fate indenant di une part impuartante de societât catalane. Chest an, in spiete dal referendum pe indipendence dai 9 di Novembar, che Madrid nol ricognòs, la “Diada” e sarà la zornade dal “V 11”: l’intindiment al è chel di jemplâ di int par undis chilometris lis dôs stradis diagonâls di Barcelone  – la Gran Via e la Diagonal, che si incrosin a forme di “v” – cun chê di marcâ la “volontat” di “votar” e di “victoria”, lant daûr de mobilitazion dal an passât, la “Via Catalana”. ❚
Marco Stolfo